„ძლიერი საქართველოს“ წევრი, დეა მეტრეველი უმრავლესობის ლიდერს მამუკა მდინარაძეს მიმართავს და აცხადებს, რომ მდინარაძის მიერ გაკეთებული განცხადება - „მართლმადიდებლური ქრისტიანობა - საქართველოს სახელმწიფოს თვითმყოფადობის საყრდენი!“ - უტიფრობა და სირცხვილია.

როგორც მეტრეველი სოციალურ ქსელში წერს, მამუკა მდინარაძე „არჩევნების წინ, ხელისუფლებაში დარჩენის ჟინით შეპყრობილი, ფარისევლურ განცხადებას აკეთებს“.

დეპუტატ მამუკა მდინარაძეს - არც ერთხელ არ შეგიმჩნევია, სიტყვა არ დაგიძრავს, კითხვები არ დაგისვამს კულტურის მინისტრისთვის გელათში არსებულ უმძიმეს ვითარებაზე, ღვთისმშობლის ჩამოშლილ მოზაიკაზე, ჯვრის მონასტერში და გერგეტის სამებაში არსებულ უმძიმეს ვითარებაზე და არჩევნების წინ, ხელისუფლებაში დარჩენის ჟინით შეპყრობილი, ფარისევლურ განცხადებას აკეთებ - „მართლმადიდებლური ქრისტიანობა - საქართველოს სახელმწიფოს თვითმყოფადობის საყრდენი!“-აო, უტიფრობა და სირცხვილია.

დიახ, არაფერია საქართველოში იმაზე მეტად სახელმწიფოებრივი და ქრისტიანული ვიდრე ქართული ქრისტიანული ხელოვნება, რომელიც ნგრევის და გაქრობის პირას მიიყვანა ხელისუფლებამ და დღეს მაღალი პედესტალიდან გადმომდგარი მორალს გვიკითხავთ“, - წერს დეა მეტრეველი სოციალურ ქსელში.