დარწმუნებული ვარ, რომ აბაშა თავის ისტორიულ სათქმელს კიდევ ერთხელ იტყვის, - ასე მიმართა „კოალიცია ცვლილებებისთვის“ ერთ-ერთმა ლიდერმა, ელენე ხოშტარიამ აბაშაში შეკრებილ საზოგადოებას.

მისივე თქმით, დამოუკიდებელი, თავისუფალი, ევროპული, წარმატებული საქართველო, დღეს ისევ ხელოვნურად გამოწვევის წინაშე დააყენეს.

„მინდა, განსაკუთრებული სიტყვა გითხრათ, იმ თვალსაზრისით, რომ თუ სადმე ჩემი ოჯახისთვის ისტორიულობა, არჩევნების, ევროპისთვის ბრძოლის, თავისუფლებისთვის ბრძოლის, დასავლეთისთვის ბრძოლის იგრძნობა და აღწერილია, არის აბაშა, განსაკუთრებით სუჯუნა, საიდანაც ვართ წარმოშობით და საიდანაც უდიდესი ქართველი, ჩემი დიდი ბაბუა, აკაკი ხოშტარია იყო.

შემთხვევითი არ არის, რომ ის ძალით არის რაღაცნაირად ისტორიულ კუთხეში მიმწყვდეული, იმიტომ, რომ დღევანდელი თანამედროვე სახელმწიფო სათანადოდ არ უფრთხილდება, ხოლო ივანიშვილის რეჟიმი პირიქით წინააღმდეგია, იმ ჩვენი მთავარი ისტორიული მემკვიდრეობისა, რაც არის დამოუკიდებელი ევროპული საქართველო, დამოუკიდებელი სახელმწიფო 18-21 წლებში.

საუკუნის დასაწყისში, აკაკი ხოშტარია აშენებდა რკინიგზას, უშვებდა ახალგაზრდებს სასწავლებლად, იყიდა ფლოტის გემები და შემდეგ, აი, ეს ადამიანი, ოჯახთან ერთად, რუსებმა ბოლომდე ამოჟლიტეს. მერე დამოუკიდებლობის არჩევნებზე, მამაჩემმა გოგი ხოშტარიამ მოიგო, სწორედ აბაშაში და თქვენი მიცემული ხმით, ხელი მოაწერა დამოუკიდებლობის აქტს.

ეს ისტორიული ხაზი, ზოგადად იმ თაობის, ვინც დამოუკიდებელი სახელმწიფო შექმნა, მერე იმ თაობის, რომელმაც აღადგინა, ახლა გრძელდება და ამ პასუხისმგებლობას ყველაზე მეტად სწორედ ახლა ვგრძნობ. დამოუკიდებელი, თავისუფალი, ევროპული, წარმატებული საქართველო, რომელიც დღეს ისევ ხელოვნურად გამოწვევის წინაშე დააყენეს. სწორედ ასეთია ეს არჩევნები და არა ვინმე ცალკე პოლიტიკური ჯგუფის ამოცანა, ამიტომ დარწმუნებული ვარ, რომ აბაშა თავის ისტორიულ სათქმელს კიდევ ერთხელ იტყვის“, - განაცხადა ელენე ხოშტარიამ.

ცნობისთვის, პოლიტიკურმა გაერთიანებამ - „კოალიცია ცვლილებისთვის - გვარამია, მელია, გირჩი, დროამ“ აბაშის ოფისი გახსნა. ამასთან, „კოალიცია ცვლილებისთვის” ლიდერები დღეს სამეგრელოს მასშტაბით ოფისებს ხსნიან.