ის, რომ სამოქალაქო ორგანიზაციები უცხოური ძალის ინტერესების გამტარებელ ორგანიზაციათა რეესტრში არ რეგისტრირდებიან, კარგია - აბსოლუტურ უმრავლესობას თავიდანვე ჰქონდა გააზრებული, რომ ეს რეგისტრაცია და დამღის მოწებება არის პირველი ნაბიჯი, ისე როგორც ეს მოხდა რუსეთში, - ამის შესახებ „კოალიცია ცვლილებისთვის" ერთ-ერთმა ლიდერმა, ზურაბ გირჩი ჯაფარიძემ განაცხადა.

მისივე თქმით, "უცხოური გავლენის გამჭვირვალობის შესახებ" კანონის გაუქმებასთან დაკავშირებით, საკონსტიტუციო სასამართლოსგან პოზიტიური მოლოდინი არ აქვს.

"მე არაფერს ველი საკონსტიტუციო სასამართლოსგან. სიმართლე გითხრათ არ ვიცი, ვის აქვს ოპტიმისტური მოლოდინები. ჩემს გარშემოც არავინ ვიცი, ვინც ელოდება, რომ საკონსტიტუციო სასამართლო საღი აზრის ფარგლებში მიიღებს გადაწყვეტილებას. საკონსტიტუციო სასამართლოში აქვთ უმრავლესობა 6/3-ზე და რასაც უნდათ იმას გააკეთებინებენ.

ის, რომ არ რეგისტრირდებიან სამოქალაქო ორგანიზაციები, კარგია. ეს თავიდანვე ცხადი და გასაგები იყო. აბსოლუტურ უმრავლესობას გააზრებული ჰქონდა, რომ ეს რეგისტრაცია და დამღის მოწებება არის პირველი ნაბიჯი, ისე როგორც ეს მოხდა რუსეთში. ჯერ მიგაწებებენ დამღას და შემდეგ ამ დამღაზე აწებებენ დამატებით შეზღუდვებს, რაც საბოლოო ჯამში, მიდის იმისკენ, რომ ქვეყანაში აღარ იარსებებს აღარც სამოქალაქო სექტორი, აღარც კრიტიკული მედია, ცალკე წამოწყებულია პროცესი ოპოზიციური პარტიების წინააღმდეგ და აღარც კრიტიკული ოპოზიციური პარტიები [იქნებიან]. ეს არის ის გზა, რაც გაიარა ყველა ასეთმა კანონმა, ყველა ქვეყანაში, სადაც მიიღეს და არაფერს ახალს ესენი არ აკეთებენ," - განაცხადა ჯაფარიძემ.

ცნობისთვის, უცხოური ძალის ინტერესების გამტარებელ ორგანიზაციათა რეესტრში რეგისტრირების ვადა დღეს იწურება.