მარნეულის მუნიციპალიტეტის ახალგაზრდულმა საბჭომ გასვლითი სხდომა გამართა. ამის შესახებ ინფორმაციას მარნეულის მუნიციპალიტეტი ავრცელებს.

როგორც გავრცელებულ განცხადებაშია ნათქვამი, სხდომის ფარგლებში დასუფთავების აქციაც გაიმართა.

„სხდომაზე საბჭოს წევრებმა მარნეულის მუნიციპალიტეტის მერის მოადგილესთან, თემურ შუბითიძესთან, ჯანდაცვის, სოციალური უზრუნველყოფის, კულტურისა და სპორტის სამსახურის უფროსთან, ნინო დეკანოიძესთან და განათლების, კულტურის, სპორტის და ახალგაზრდულ საქმეთა განყოფილების ხელმძღვანელთან, ელგუჯა კუპატაძესთან ერთად განიხილეს ადგილობრივი ახალგაზრდებისთვის აქტუალური თემები და სამომავლო გეგმები.

ამასთან, გადაჭრილ გორაზე მოეწყო შემეცნებით-საგანმანათლებლო ტური. აღნიშნულ ლოკაციაზე მეცნიერებმა კვლევების შედეგად ღვინის პირველი კვალი აღმოაჩინეს რაც ადასტურებს, რომ ადამიანმა სწორედ აქ დაწურა პირველად ყურძენი.

აღსანიშნავია, რომ დღის განმავლობაში გასვლით სხდომას საქართველოს პარლამენტის წევრი ზაურ დარგალი და საკრებულოს თავმჯდომარე ამირან გიორგაძე შეუერთდნენ და შეხვედრა ინტერაქციულ რეჟიმში გაგრძელდა.

სხდომის ფარგლებში, ასევე, გაიმართა დასუფთავების აქცია, რაც ხაზს უსვამს ახალგაზრდების აქტიურ ჩართულობას და პასუხისმგებლობას გარემოს დაცვაში“,- ნათქვამია განცხადებაში.