ამ დაჯგუფების გასამართლება ლეგიტიმური მიზანი და ქართველი ხალხის დაკვეთაა. „ნაციონალური მოძრაობა“ აუცილებლად გასამართლდება და ქართველი ხალხის ეს დაკვეთა 2024 წლის არჩევნების შემდეგ რეალობად იქცევა, - ამის შესახებ პარლამენტის ვიცე-სპიკერმა, ნინო წილოსანმა პარლამენტის პლენარულ სხდომაზე განაცხადა.

მისი თქმით, დემოკრატიული სახელმწიფოსთვის დამაზიანებელია ის, რაც „ნაციონალური მოძრაობა“ წლებია ემსახურება.

„დღეს ბიუროზე „ნაციონალურმა მოძრაობამ“ წერილი გამოგვიგზავნა, რომ ბოიკოტს უცხადებს პარლამენტს და სხდომებში მონაწილეობას არ მიიღებს. თავისთავად, მათ საპარლამენტო საქმიანობაში მონაწილეობა ხომ ცალკე ირონია არის, მაგრამ მინდა შეგახსენოთ, რომ ეს ის პარტია არის, რომლის გასამართლებასაც ქართველი ხალხი 2012 წლიდან ითხოვს. სხდომების ბოიკოტირება კი არა, თავად ქართულ პოლიტიკაში ამ პარტიის მონაწილეობა სრული ანომალია და უფრო მეტიც, ეროვნული სირცხვილია. „კოლექტიურ ნაციონალურ მოძრაობას“ ბრალი მიუძღვის ქართველი ხალხის და ქართული სახელმწიფოს წინაზე, როგორც ქვეყნის ინტერესებისთვის საზიანო და ანტისახელმწიფოებრივი დაჯგუფება. ამის ფონზე ისინი რომ ისევ პოლიტიკაში რჩებიან, არის დაუშვებელი. მავნებლური პოლიტიკური დაჯგუფების გასამართლება და აკრძალვა ჩვენი პარტიის წინასაარჩევნო დაპირებაა. მსოფლიო პრაქტიკა ანტისახელმწიფოებრივი პარტიების გასამართლება-აკრძალვასთან დაკავშირებით ჩვენს შემთხვევაში ვერ გახდება კრიტიკის საფუძველი მიუხედავად შესაძლო მცდელობისა“, - განაცხადა წილოსანმა.

მისი განმარტებით, „ნაციონალურ მოძრაობას“ ანტიდემოკრატიული, ანტიჰუმანური და ანტიადამიანური ქმედებები უკავშირდება.

„2023 წლიდან ეს პარტიად წოდებული „დაჯგუფება“ არაერთი ანტიკონსტიტუციური და ანტისახელმწიფოებრივი ქმედების სათავეშია. მათ ანგარიშზეა დაკარგული ტერიტორიები, დარბეული მედია, დატერორებული ბიზნესი, ნაწამები პატიმრები, უსამართლოდ მოკლული ახალგაზრდები. ასე უსასრულოდ გრძელდება იმ დანაშაულებრივი ქმედებების ჩამონათვალი, რომელთა ნაწილზეც დღეს უკვე ინდივიდუალურად მათი არაერთი ლიდერია გასამართლებული და დამნაშავედ ცნობილი, მაგრამ პარტია „ნაციონალური მოძრაობა“ ისევ გვეძალება. ფაქტია, ოპოზიციაში ყოფნისას მათ არანაკლებ მავნებლური მიზნები ამოძრავებდათ. ასოცირების შეთანხმების ხელისშეშლიდან დაწყებული, ქვეყნის შიდა არეულობით და ქვეყანაში საომარი მდგომარეობის დაწყების სურვილით დასრულებული. ეს არის „კოლექტიური ნაციონალური მოძრაობა“, მისი სახე და ხელწერა, როგორც არ უნდა გადაჯგუფდნენ ისინი, ჯამი უცვლელია და ეს ჯამი არის ბოროტი „ნაცკლასტერი“, - განაცხადა წილოსანმა.