უნგრეთი, პრემიერ-მინისტრ ვიქტორ ორბანის ხელმძღვანელობით, არ იქცევა ისე, როგორც დასავლეთის ქვეყნების უმეტესობა უკრაინაში რუსეთის აგრესიულ ომთან დაკავშირებით, - ამის შესახებ ესტონეთის საგარეო საქმეთა მინისტრმა, მარგუს ცაჰკნამ განაცხადა.

"სამწუხაროდ, სწორედ ამ საკითხში, ორბანმა ნამდვილად დაიწყო თამაში მოწინააღმდეგე გუნდში," - აღნიშნა მარგუს ცაჰკნამ.

ჟურნალისტებმა ესტონეთის საგარეო საქმეთა სამინისტროს ხელმძღვანელს ჰკითხეს, რატომ არ შეუძლია ევროკავშირს, რომლის თავმჯდომარე ქვეყანა ამჟამად უნგრეთია, რაიმე მოიმოქმედოს ამასთან დაკავშირებით, რაზეც მარგუს ცაჰკნამ უპასუხა, რომ ევროკავშირს „კიდევ შეუძლია რაღაცის გაკეთება“.

„დაწყებულია ევროკავშირის ხელშეკრულების მე-7 მუხლით გათვალისწინებული პროცედურა, რაც ნიშნავს წევრი სახელმწიფოს ხმის უფლების შეჩერებას. არ მჯერა, რომ ეს მოხდება, რადგან ამას 26-ვე ქვეყნის თანხმობა სჭირდება, მაგრამ მაინც გვინდა, რომ უახლოეს მომავალში შევქმნათ სიტუაცია, სადაც 21 ქვეყანა შეძლებს ამ პროცესში წინსვლას“, - აღნიშნა ესტონეთის საგარეო საქმეთა მინისტრმა.