საქართველოს პარლამენტის წევრები, რომლებმაც „რუსული კანონი“ მიიღეს და რომელსაც თავად უწოდებდნენ გამჭვირვალობის კანონს, თვითონ არ ასრულებენ სახელმწიფოს წინაშე მდგარ ვალდებულებას, მათი დეკლარაციები არ არის გამჭვირვალე, - ამის შესახებ „ერთიანობა - ნაციონალური მოძრაობის“ ანტიკორუფციული მიმართულების მდივანმა, ვასო ურუშაძემ ifact.ge-ის ჟურნალისტურ გამოძიებასთან დაკავშირებით განაცხადა, რომლის მიხედვითაც ვიქტორ ჯაფარიძე თავის შემოსავლებს მალავს.

ურუშაძის თქმით, გადაწყვეტილების მიმღები პირები კორუფციულ ჭაობში არიან ჩაფლული.

„არ არის გამჭვირვალე მათი ოჯახის წევრები, რა კერძო ბიზნეს საქმიანობით არიან დაკავებულები. ისინი დიდი ოდენობით სახელმწიფო ქონების განკარგვაში მონაწილეობენ, პირდაპირი ხელშეკრულებებით იღებენ მილიონობით ლარს სახელმწიფო ბიუჯეტიდან და შემდეგ უკვე მას ხარჯავენ არარაციონალურად. უმრავლეს შემთხვევაში, დარღვეულია პირობები, რომელიც მათ სახელმწიფოსთან აღებული აქვთ. დიდი ოდენობის სახელმწიფო საბიუჯეტო სახსრების გამოყენება კორუფციული გზით ხდება. არ არის ჯანსაღი კონკურენტული გარემო, რაც თავისთავად აზიანებს სახელმწიფო ბიუჯეტს, სახელმწიფოს ინტერესებს. მთავარი ვალდებულება სახელმწიფო ჩინოვნიკის პარლამენტის წევრის, მთავრობის წარმომადგენლის არის, რომ მათი შემოსავალი იყოს გამჭვირვალე. თუ ვინმეს გამჭვირვალობის ვალდებულება გააჩნია, ეს არის თავად ის დეპუტატები, რომლებიც საქართველოს პარლამენტში არიან და დაკავებულები არიან კორუფციული საქმიანობით, სახელმწიფო ბიუჯეტის მიტაცებით, სახელმწიფო რესურსების არარაციონალური გამოყენებით და ივანიშვილის კორუფციულ პირამიდას წარმოადგენენ. ყველა ის ადამიანი, რომლებიც ჩართულები არიან სახელმწიფოს მართვაში, გადაწყვეტილების მიღებაში, არის ჩაფლული კორუფციულ ჭაობში. სწორედ ეს არის ივანიშვილის მთავარი საყრდენი, მთავარი ინსტრუმენტი სახელმწიფო ჩინოვნიკების მართვის და ერთგულების, რადგან ისინი არიან კომპრომეტირებულები, კორუფციაში ჩართულები, რაც ივანიშვილისთვის არის ბერკეტი, რომ მორჩილად მართოს სახელმწიფო ჩინოვნიკები, პარლამენტის წევრები. მათ არ გააჩნიათ გადაწყვეტილების მიღების შესაძლებლობა“,- განაცხადა ვასო ურუშაძემ.

ინფორმაციას პარტიის პრესსამსახური ავრცელებს.