„ქართული ოცნება“ „სამართლიანი არჩევნების“ 2024 წლის საპარლამენტო არჩევნების არაოფიციალური წინასაარჩევნო პერიოდის მონიტორინგის ანგარიშს „სრულიად აბსურდულსა და უსაფუძვლოს“ უწოდებს.

აღნიშნულის შესახებ საპარლამენტო უმრავლესობის წევრმა გივი მიქანაძემ პარტიის ცენტრალურ ოფისში გამართულ პრესკონფერენციაზე ისაუბრა და განაცხადა, რომ „სამართლიანი არჩევნების“ ანგარიშში ქვეყანაში არსებულ ძლიერ პოლარიზაციაზეა საუბარი, თუმცა, „არაფერია ნათქვამი რამდენიმე არასამთავრობოს მიერ ღიად წარმოებულ ცრუ კამპანიაზე, რომელიც სწორედ საზოგადოების პოლარიზებას უწყობს ხელს“.

„ანგარიშში საუბარია ქვეყანაში ძლიერი პოლარიზაციის პირობებზე. ეს დასკვნა განსაკუთრებით გასაოცარია იმ ფონზე, როცა რამდენიმე არასამთავრობო ორგანიზაცია ღიად აწარმოებს საინფორმაციო კამპანიას, თითქოს, საპარლამენტო არჩევნები არის არჩევანი ევროპასა და არა ევროპას შორის. ამგვარი ცრუ კამპანიის მიზანი სხვა არაფერია თუ არა საზოგადოების პოლარიზება. თუმცა, სამართლიანი არჩევნების ანგარიშში არასამთავრობო ორგანიზაციების ამ კამპანიაზე არაფერია ნახსენები“, - განაცხადა გივი მიქანაძემ.

როგორც მიქანაძემ განაცხადა, საზოგადოებისთვის, „სამართლიანი არჩევნების“, როგორც 2020 წლის საპარლამენტო არჩევნების პარალელური დათვლის მონაცემების გამყალბებელი და რეპუტაციაშელახული ორგანიზაციის, მხრიდან მსგავსი მიკერძოებული მიდგომა გასაკვირი არ არის

ამასთან, მისი განცხადებით, აღნიშნული ორგანიზაცია, დიდი ხანია გასცდა ნეიტრალურობას და მთელი რესურსით მობილიზებულია მმართველი გუნდის დისკრედიტაციაზე.

„ფაქტია, რომ ეს ორგანიზაცია დიდი ხანია გასცდა ნეიტრალურობას, განსაკუთრებით 2022 წლის ზაფხულში, როდესაც სხვებთან ერთად გამართულ მიტინგზე შეუერთდა ხელისუფლების გადადგომის, ტექნიკური მთავრობის დანიშვნისა და ვადამდელი არჩევნების მოთხოვნას. 4 სექტემბერს წარმოდგენილი ანგარიში კიდევ ერთი დასტურია, რომ „სამართლიანი არჩევნები“ მთელი თავისი რესურსით მობილიზებულია საზოგადოებაში მოახდინოს მმართველი გუნდის დისკრედიტაცია. ჩვენმა უცხოელმა პარტნიორებმა ორგანიზაციის ასეთ მიდგომას განსაკუთრებული ყურადღება უნდა მიაქციონ და გაითვალისწინონ, რომ „სამართლიანი არჩევნები“ ჩამოყალიბდა მხარედ და არ არის პოლიტიკურად ნეიტრალური ორგანიზაცია“, - განაცხადა გივი მიქანაძემ „ქართული ოცნების“ ცენტრალურ ოფისში გამართულ ბრიფინგზე.