ზუსტად ერთი თვე გავიდა რუსეთის კურსკის ოლქში ჩვენი ოპერაციის დაწყებიდან, უკრაინის შეიარაღებული ძალები ამჟამად 1 300 კვადრატულ კილომეტრ ტერიტორიას აკონტროლებს, - ამის შესახებ უკრაინის პრეზიდენტმა, ვოლოდიმირ ზელენსკიმ გერმანიაში, უკრაინის თავდაცვის საკითხებზე საკონტაქტო ჯგუფის, ე.წ. „რამშტაინის“ შეხვედრაზე განაცხადა.

„დღეს ზუსტად ერთი თვე გავიდა რუსეთის კურსკის ოლქში ჩვენი ოპერაციის დაწყებიდან. ეს ის საზღვარია, საიდანაც პუტინი უკრაინის ტერიტორიაზე ომის გასავრცელებლად ემზადებოდა. ის ემზადებოდა ახალი შეტევის დასაწყებად ჩვენი ქალაქ სუმის წინააღმდეგ. ჩვენ შემოვაბრუნეთ თამაში და ჩვენი კონტრშეტევის წყალობით ომს რუსეთის ტერიტორიისკენ ვუბიძგებთ“, - აღნიშნა ზელენსკიმ.

მისი თქმით, უკრაინის შეიარაღებული ძალები ამჟამად კურსკის ოლქში აკონტროლებს 1 300 კვადრატულ კილომეტრ ტერიტორიას, რომელიც 100-ზე მეტი დასახლებას მოიცავს.

„ამ ტერიტორიის მნიშვნელოვანი ნაწილი უბრალოდ მიატოვეს რუსულმა ჯარებმა. ისინი უბრალოდ გაიქცნენ, როცა დაინახეს ჩვენი ჯარის მიახლოება", - განაცხადა ზელენსკიმ.

ამასთან, მისი თქმით, კურსკის ოლქში სამხედრო ოპერაციის პირველი თვის განმავლობაში დაახლოებით 6 000 რუსი ჯარისკაცი დაიღუპა და დაიჭრა.