ლიბერალური ფაშიზმის მორიგი გამოვლინება ვიხილეთ ჩვენ და ამ ყველაფერმა შეიწირა ადამიანის სიცოცხლე - ეს არის უმძიმესი, ტრაგიკული შემთხვევა, - ამის შესახებ პრემიერ-მინისტრმა, ირაკლი კობახიძემ წყალტუბოში, „ქართული ოცნების“ წარმომადგენლის გარდაცვალების ფაქტთან დაკავშირებით განაცხადა.

მისივე თქმით, კრებსითად „ნაცმოძრაობის“ აკრძალვას აქვს გადამწყვეტი მნიშვნელობა ქვეყნის დემოკრატიული სისტემისთვის.

„პირველ რიგში, მინდა ოჯახის მიმართ სამძიმარი გამოვთქვა. ეს არის უმძიმესი, ტრაგიკული შემთხვევა. ეს კიდევ ერთხელ აჩვენებს, თუ რამდენად ყურადსაღებია ის ტენდენციები, რომლებიც ხელოვნურად ინერგება ჩვენს საზოგადოებრივ სივრცეში, ქართულ პოლიტიკაში. ეს არის თავიდან ბოლომდე გარედან ხელოვნურად დანერგილი ტენდენციები, რასაც ჩვენ ლიბერალურ ფაშიზმს ვუწოდებთ. ამის მორიგი გამოვლინება ვიხილეთ ჩვენ და ამ ყველაფერმა შეიწირა ადამიანის სიცოცხლე. ჩვენ ყველაფერი უნდა გავაკეთოთ იმისთვის, რომ საქართველოში ლიბერალური ფაშიზმი დასრულდეს. ამისთვის კოლექტიური „ნაცმოძრაობის“, კრებსითად „ნაცმოძრაობის“ აკრძალვას ექნება გადამწყვეტი მნიშვნელობა. თუ პოლიტიკურ სისტემაში დარჩება კოლექტიური „ნაცმოძრაობა“, ამ შემთხვევაში, ჩვენ დაგვრჩება ლიბერალური ფაშიზმი. როდესაც აიკრძალება „ნაცმოძრაობა“, როგორც არაკონსტიტუციური პოლიტიკური პარტია, საქართველოში მაშინვე დასრულდება ლიბერალური ფაშიზმი, ე.წ პოლარიზაცია, რადიკალიზმი. ეს არის აუცილებელი ქვეყანაში დემოკრატიული სისტემისთვის“,- განაცხადა კობახიძემ.

ცნობისთვის, საპარლამენტო უმრავლესობის წევრის, გივი მიქანაძის განცხადებით, „ნაციონალური მოძრაობის“ წარმომადგენელმა მათი გუნდის წევრს, ერმილე გიგიაძეს წყალტუბოში, „ქართული ოცნების“ ოფისთან სიტყვიერი შეურაცხყოფა მიაყენა, რის შემდეგაც გიგიაძე, ნერვიულობის ნიადაგზე, ადგილზე გარდაიცვალა.

უმრავლესობის დეპუტატების განცხადებით, აღნიშნული ფაქტი იმ ფაშისტური პოლიტიკისა და საქმიანობის გამოხატულებაა, რომელსაც „ნაციონალური მოძრაობა“ ეწეოდა და აგრძელებს.