საქართველოს საპარლამენტო დელეგაციამ, ევროპასთან ინტეგრაციის კომიტეტის თავმჯდომარის მაკა ბოჭორიშვილის ხელმძღვანელობით, მონაწილეობა მიიღო ბუდაპეშტში გამართულ ევროკავშირის ერთიანი საგარეო და უსაფრთხოების პოლიტიკისა (CFSP) და ერთიანი უსაფრთხოებისა და თავდაცვის პოლიტიკის (CSDP) საპარლამენტთაშორისო კონფერენციაში. ინფორმაციას საქართველოს პარლამენტის პრესსამსახური ავრცელებს.

კონფერენციის ფარგლებში, საპარლამენტო დელეგაციების წარმომადგენლებმა იმსჯელეს ევროკავშირის მომავალზე და გაფართოების პოლიტიკის მიმდინარე პროცესზე, ევროკავშირის ერთიანი საგარეო და უსაფრთხოების პოლიტიკისა (CFSP) და ერთიანი უსაფრთხოებისა და თავდაცვის პოლიტიკის (CSDP) პრიორიტეტებზე, განიხილეს გარე საზღვრების დაცვისა და არალეგალური მიგრაციის საკითხი, დისკუსია ასევე გაიმართა მსოფლიოში გეოპოლიტიკურ და სტრატეგიულ ძვრებზე, რუსეთის თავდასხმის გავლენაზე უკრაინის ეკონომიკასა და ინფრასტრუქტურაზე.

ევროკავშირის გაფართოების პოლიტიკაზე საუბრისას, მაკა ბოჭორიშვილმა აღნიშნა საქართველოს გეოპოლიტიკური მნიშვნელობა. ისაუბრა საქართველოს პროგრესზე ევროინტეგრაციის კუთხით, ქვეყნის წინაშე მდგარ გამოწვევებსა და კანდიდატ ქვეყნებთან მოლაპარაკებების დროულად დაწყების საჭიროებაზე.

თავდაცვისა და უშიშროების კომიტეტის წევრმა ხატია წილოსანმა სიტყვით გამოსვლისას ისაუბრა საქართველოს საზღვრების დაცვისა და არალეგალური მიგრაციის მართვის წარმატებულ პროცესებზე, ხაზი გაუსვა ევროპის საზღვრების კონტროლის კუთხით ევროკავშირთან აქტიურად თანამშრომლობის მნიშვნელობას.

"ვიზალიბერალიზაციის მიღების შემდეგ, საქართველომ გაააქტიურა თანამშრომლობა ევროკავშირის შესაბამის ინსტიტუტებთან და ქვეყანაში მიიღო ინტეგრირებული საზღვრის მართვის სტრატეგია და რისკის ანალიზის ერთიანი სისტემა. მნიშვნელოვნად გააუმჯობესა საზღვრის კონტროლი და აქტიურად თანამშრომლობს პარტნიორებთან რეგიონში არსებული გამოწვევების გათვალისწინებით", - განაცხადა ხატია წილოსანმა.

საპარლამენტთაშორისო კონფერენციის ფარგლებში, საქართველოს პარლამენტის წევრებმა ორმხრივი შეხვედრები გამართეს ევროკავშირის წევრ და კანდიდატი ქვეყნების წარმომადგენლებთან.

ევროკავშირის ერთიანი საგარეო და უსაფრთხოების პოლიტიკისა (CFSP) და ერთიანი უსაფრთხოებისა და თავდაცვის პოლიტიკის (CSDP) საპარლამენტთაშორისო კონფერენცია ევროკავშირის თავმჯდომარე ქვეყნის - უნგრეთის მასპინძლობით ბუდაპეშტში, 9-10 სექტემბერს გაიმართა და მასში ევროკავშირის წევრი და კანდიდატი ქვეყნების ეროვნული პარლამენტების წევრები და ევროკავშირის ინსტიტუტების მაღალი რანგის წარმომადგენლები მონაწილეობდნენ.

საქართველოს პარლამენტიდან დელეგაციის შემადგენლობაში არიან ევროპასთან ინტეგრაციის კომიტეტის თავმჯდომარის პირველი მოადგილე ლევან ქარუმიძე და თავდაცვისა და უშიშროების კომიტეტის წევრი ხატია წილოსანი.