ჯანსაღი ცხოვრების წესი არის ერთ-ერთი მთავარი პრიორიტეტი ჩვენს პროგრამაში , - განაცხადა პარლამენტის პირველმა ვიცე-სპიკერმა, გია ვოლსკიმ იმის შესახებ საუბრისას, თუ რატომ მოხვდნენ „ქართული ოცნების“ საპარლამენტო სიაში სპორტსმენები, ლაშა ტალახაძე და გენო პეტრიაშვილი.

როგორც გია ვოლსკიმ აღნიშნა, სპორტსმენები არიან ადამიანები, რომელთაც იციან, რა სჭირდებათ ახალგაზრდებს.

„ჩვენი ოპონენტები შეეცდებიან, რომ ამა თემას აბსოლუტურად არასწორი ინტერპრეტაცია შესძინონ. საქართველოს სპორტი არ ჭირდება და კულტურა არ სჭირდება? - თუ ეს დარგი უკვე იმდენად განვითარებულია, რომ არაფერი აღარ სჭირდება, რომ აღარ არის საჭირო არც სპორტსმენი, არც გამოჩენილი ადამიანი, თავის ქვეყნის მიმართ დამოკიდებულების გამომხატავი?

სპორტსმენებთან დაკავშირებით არის წარმოდგენა, რომ თითქოს, მან მარტო სპორტი იცის ან მარტო სიმძიმის აწევა, ჭიდაობა თუ ფეხბურთი. აქ იმ ადამიანებზეა ლაპარაკი, რომელთაც იციან, რა სჭირდება ახალგაზრდობას“, - განაცხადა გია ვოლსკიმ.

შეგახსენებთ, "ქართულმა ოცნებამ" საარჩევნო სიის პირველი ოცეული წარადგინა, რომელთა შორის არიან ქართველი სპორტსმენები - ლაშა ტალახაძე და გენო პეტრიაშვილი.