„ერთიანი ნაციონალური მოძრაობის“ თბილისის ორგანიზაციის თავმჯდომარე, სოფო ჯაფარიძე და თბილისის საკრებულოში ფრაქცია ენმ-ის თავმჯდომარე, ირაკლი ნადირაძე დიდუბე-ჩუღურეთის მოსახლეობას შეხვდნენ. ინფორმაციას პარტიის პრესსამსახური ავრცელებს.

მათივე ცნობით, შეხვედრის შემდეგ სოფო ჯაფარიძემ განაცხადა, რომ ამომრჩეველთა განწყობა ამაღლებული და ოპტიმისტურია.

„დიდუბეში განწყობა საოცრად ამაღლებულია. ეს ადამიანები ირჩევენ კეთილდღეობას ევროპაში. დიახ, აღარასოდეს იქნება სიღატაკე იზოლაციაში, იმის მიუხედავად, რომ ამდენი წლის განმავლობაში, „ქართული ოცნება“ ყველა ღონეს ხმარობს, ჩვენი ქვეყანა იზოლაციაში მოაქციოს, რომ უმუშევრობა, მაღალი ფასები, დაბალი პენსიები იყოს.

ჩვენს თბილისელებს ყოველდღიურად ვხვდები და ვესაუბრები, შევდივართ თითოეულ ოჯახში, ვისმენთ ყველას პრობლემებს.

26 ოქტომბრის შემდეგ, ყველანი ერთად აუცილებლად ავირჩევთ კეთილდღეობას ევროპაში. ჩვენი ქვეყნის ამ ღირსეულ მოქალაქეებს ექნებათ ღირსეული ხელფასები, ევროპული პენსიები, ევროპული განათლება და ჯანდაცვა.

ეს ყველაფერი იქნება, როცა ხელისუფლება პროფესიონალებით, პატიოსანი ადამიანებით დაკომპლექტება და არა კორუფციაში ჩაბმული ადამიანებით", - განაცხადა სოფო ჯაფარიძემ.