იენს სტოლტენბერგი მიუნხენის უსაფრთხოების კონფერენციის ახალი თავმჯდომარე გახდება. ამის შესახებ ინფორმაციას გამოცემა Politico საკითხში ინფორმირებულ წყაროზე დაყრდნობით ავრცელებს.

ნორვეგიის ყოფილი პრემიერ-მინისტრი და ნატოს ამჟამინდელი გენერალური მდივანი, იენს სტოლტენბერგი აღნიშნულ თანამდებობაზე გერმანელ დიპლომატ კრისტოფ ჰოისგენს ჩაანაცვლებს, რომელიც მიუნხენის უსაფრთხოების კონფერენციას ბოლო ორი წლის განმავლობაში თავმჯდომარეობს.

კონფერენციის 2008-2022 წლების თავმჯდომარე, ვოლფგანგ იშინგერი მიუნხენის უსაფრთხოების კონფერენციის ფონდის დამფუძნებელი საბჭოს პრეზიდენტად დარჩება.

ცნობისთვის, იენს სტოლტენბერგს ნატოს გენერალური მდივნის თანამდებობაზე 2024 წლის 1 ოქტომბერს ნიდერლანდების ყოფილი პრემიერ-მინისტრი, მარკ რუტე ჩაანაცვლებს.