მიყვარს ბათუმი, რადგან ეს არის ქალაქი თავისუფალი სულით, - ამის შესახებ “კოალიცია ცვლილებებისთვის” ერთ-ერთმა ლიდერმა, ნიკა გვარამიამ ბათუმის ოფისის გახსნაზე განაცხადა.

მისივე თქმით, უაღრესად თანამედროვე ევროპულ ქალაქში უნდა გაჩნდეს განცდა, რომ როგორც ბათუმი, ისე ყველა შავი ზღვისპირა ქალაქი არის ევროპის კარი.

„მოგესალმებით როგორც სოხუმელი ზღვისპირელი ასევე ზღვისპირელებს. მიყვარს თქვენი ქალაქის თავისუფალი სული. უაღრესად თანამედროვე ევროპულ ქალაქში უნდა გავაჩინოთ განცდა, რომ როგორც ბათუმი, ისე ყველა შავი ზღვისპირა ქალაქი არის ევროპა, კარი ევროპაში. როგორც ჩვენ გვჭირდება ევროკავშირი, ისე სჭირდება ევროკავშირს ბათუმიც, სოხუმიც, გაგრაც. ჩვენ შევალთ ევროპაში, ბედნიერებაში და განსხვავებულ ცხოვრებას 26 ოქტომბრიდან დავიწყებთ“ - აღნიშნა გვარამიამ.

ამასთან, შტაბის გახსნაზე „კოალიცია ცვლილებისთვის” კიდევ ერთმა ლიდერმა, გიორგი კირთაძემ განაცხადა, რომ ეს არის ყველაზე ევროპული ქალაქი საქართველოში, საიდანაც იწყებოდა ცვლილებები ამ ქვეყანაში.

მისივე თქმით, ცვლილებების გარეშე გარდაუვალია კეთილდღეობა, ცვლილებები მოხდება ძალიან მალე და „ვიცხოვრებთ ბედნიერ და ევროპულ საქართველოში“.

„როგორც არასდროს, დღეს გვჭირდება ცვლილებები, რომელიც წაგვიყვანს წინ. ცვლილებები მოხდება ძალიან მალე და ვიცხოვრებთ ბედნიერ საქართველოში, სადაც ლუკმა-პურის საშოვნელად ხალხი კი არ მიდის, არამედ უკან ბრუნდება”, - განაცხადა გიორგი კირთაძემ.

ბათუმის ოფისის გახსნაზე მხარდამჭერებს სიტყვით მიმართა კოალიციის კიდევ ერთმა ლიდერმა ხათუნა სამნიძემაც, რომელმაც განაცხადა, რომ ამაყია „რესპუბლიკურ პარტიასთან“ ერთად კოალიციაში გაერთიანებით.

„მე ვარ ამაყი, რომ „რესპუბლიკურ პარტიასთან“ ერთად ვარ ერთობაში, სადაც ყველა ლიდერის ბრძოლა ნანახი აქვთ ადამიანებს. ჩვენ გვჯერა ჩვენი ბრძოლის სიმტკიცის და მიზანდასახულობის. აქ არის გუნდი, რომლის ქვეყნის მომავალი არის მრავალფეროვანი და ევროპული. ძალა არის ჩვენს კულტურაში, ტრადიციებში, შვილების რწმენაში, რომ ქვეყანა უნდა იყოს ევროპული.დღეს ყველას სჯერა, რომ ევროპული მომავალი არის დასაცავი და ამას ვიცავთ 26 ოქტომბერს. დარწმუნებული ვარ, შევძლებთ, თითოეული ბათუმელი იქნება მზად 26 და 27 ოქტომბერს. იქნება მზად იმისთვის, რომ ვერავინ წაგვართვას არჩევანი. ჩვენს კოალიციას სჯერა მომავლის, გვჯერა ცვლილებების. ჩვენ გვჯერა თითოეული მოქალაქის ძალის, რწმენის. ჩვენ თქვენთან ერთად ვიქნებით ამ ხნის მანძილზე”, - განაცხადა სამნიძემ.