პრობლემებზე და ამ პრობლემების გადაწყვეტის გზებზე ვსაუბრობთ - როგორ ჰქონდეს საქართველოს თითოეულ მოქალაქეს ევროკავშირის პასპორტი, როგორ შეეძლოთ უვიზო მიმოსვლა აშშ-ში, როგორ ექნება ჩვენს ქვეყანას 14 მილიარდ ევროიან ფონდთან წვდომა, - ამის შესახებ თბილისის საკრებულოში ფრაქცია „ერთიანი ნაციონალური მოძრაობის“ თავმჯდომარემ, ირაკლი ნადირაძემ სამგორის მოსახლეობასთან შეხვედრისას განაცხადა.

მისივე განმარტებით, საზოგადოებას სხვა პრობლემებთან ერთად გაზრდილი გადასახადები და მომატებული ფასები აწუხებს.

„ჩვენ ახლა სამგორში ვიმყოფებით, მთავარი პრობლემები, რა თქმა უნდა, გაჭირვება, სიღატაკე, გაზრდილი ფასები, გაზრდილი კომუნალური გადასახადები, საბანკო ოლიგარქია და ფასების მაფიაა, რის გამოც, პროდუქტებზე ფასები გაზრდილია და ასევე ვსაუბრობთ ამ პრობლემების გადაწყვეტის გზებზე, მათ შორის, როგორ ჰქონდეს საქართველოს თითოეულ მოქალაქეს ევროკავშირის პასპორტი, როგორ შეეძლებათ უვიზო მიმოსვლა აშშ-ში, როგორ ექნება ჩვენს ქვეყანას წვდომა 14 მილიარდ ევროიან ფონდთან, რაც ამ ქვეყანაში მოიტანს მაღალანაზღაურებად სამუშაო ადგილებს, უკეთეს პენსიას, უკეთეს ჯანდაცვას და ყველა იმ სიკეთეს, რომელთა არქონის გამოც, სამწუხაროდ, ამჟამად უამრავი ჩვენი თანამოქალაქე ტოვებს ქვეყანას“, - განაცხადა ნადირაძემ, რომლის კომენტარსაც „ერთიანობა - ნაციონალური მოძრაობა“ ავრცელებს.