ბიძინა ივანიშვილმა ერთი-ერთში გაიმეორა ოკუპანტი სახელმწიფოს ოფიციალური პოზიცია და მორიგი მოღალატეობრივი, ანტიეროვნული, ანტიქართული განცხადება გააკეთა,- ამის შესახებ “კოალიცია ცვლილებისთვის - გვარამია, მელია, გირჩი, დროას” განცხადებაშია ნათქვამი.

ამასთან, განცხადებასი განმარტავენ, რომ “ქართული ოცნების” მსგავსი განცხადებები ძირს უთხრის არაღიარების პოლიტიკას და ლეგიტიმაციას აძლევს ჩვენი სამშობლოს დანაწევრებას.

“გუშინ, გორში, ქალაქში, რომელმაც ყველაზე კარგად იცის 2008 წელს ვინ იყო აგრესორი და ვინ საკუთარი სამშობლოს დამცველი, ბიძინა ივანიშვილმა ერთი-ერთში გაიმეორა ოკუპანტი სახელმწიფოს ოფიციალური პოზიცია და მორიგი მოღალატეობრივი, ანტიეროვნული, ანტიქართული განცხადება გააკეთა.

“ქართული ოცნების” მსგავსი განცხადებები ძირს უთხრის არაღიარების პოლიტიკას და ლეგიტიმაციას აძლევს ჩვენი სამშობლოს დანაწევრებას.

ისტორიის გაყალბების გუშინდელი უმძიმესი ფაქტი არის ჩვენი წინაპრების შეურაცხყოფა, გმირი სამხედროებისა და მათი ოჯახების, თითოეული ჩვენგანის და მთელი ჩვენი ერის და სამშობლოსი.

ეს თავხედური თავდასხმა საქართველოს ისტორიაზე, აწმყოსა და მომავალზე კიდევ ერთხელ გვახსენებს, რომ 26 ოქტომბერს, ყოველგვარი გადაჭარბების გარეშე, ჩვენი სამშობლოს ბედი წყდება. საქართველოს ღირსეული მომავალი ჩვენს ხელშია”,- აღნიშნულია განცხადებაში.

ცნობისთვის, გუშინ გორში, „ქართული ოცნების“ რეგიონულ შეხვედრაზე ბიძინა ივანიშვილმა განაცხადა, რომ „26 ოქტომბრის არჩევნების დასრულებისთანავე, ჩვენ აუცილებლად გამოვძებნით საკუთარ თავში ძალას, რათა ბოდიში მოვიხადოთ იმის გამო, რომ დავალების შესაბამისად, მოღალატე „ნაციონალურმა მოძრაობამ“ 2008 წელს ცეცხლის ალში გახვია ჩვენი ოსი დები და ძმები“. როგორც ივანიშვილმა აღნიშნა, 2008 წლის აგვისტოს ომი არ ყოფილა არც ქართველი და არც ოსი ხალხის სურვილი.