მისი [მიხაილ როთის] საქართველოში ჩამობრძანება, რა თქმა უნდა, იმას ემსახურება, რომ შეხვდეს რადიკალური ოპოზიციის წარმომადგენლებს, როგორც ეს მისი წინა ვიზიტის დროს მოხდა, - ამის შესახებ საპარლამენტო უმრავლესობის წევრმა, ლევან მაჭავარიანმა ჟურნალისტებთან გერმანელი პოლიტიკოსის, მიხაილ როთის საქართველოში ვიზიტთან დაკავშირებით განაცხადა.

მისი თქმით, სანამ როთი მისი წინა ვიზიტის დროს მომხდარ ფაქტებთან დაკავშირებით ბოდიშს არ მოიხდის, იქამდე უმრავლესობა არ შეხვდება.

„მისი საქართველოში ჩამობრძანება, რა თქმა უნდა, იმას ემსახურება, რომ შეხვდეს რადიკალური ოპოზიციის წარმომადგენლებს, როგორც ეს მისი წინა ვიზიტის დროს მოხდა. როთი აქციაზე გამოვიდა და ისეთი შეურაცხმყოფელი განცხადებები აკეთა, რომ სანამ ამაზე ბოდიშს არ მოიხდის, და არ მოუხდის როგორც სახელმწიფოს, ისევე ქართველ ხალხს, გამორიცხულია, რომ იქ ვისაუბროთ, რომ რაიმე ტიპის შეხვედრა შეიძლება შედგეს ჩვენი რომელიმე, მაღალი ან საშუალო, რანგის პოლიტიკური ფიგურის მხრიდან. იქიდან გამომდინარე, რომ ამ კაცმა ჩვენ შეურაცხყოფა მოგვაყენა, შეურაცხყოფა მიაყენა ქართველ ხალხს, ძალიან ცუდ კონტექსტში მოიხსენია მართლმადიდებლობა, რომელიც არის ჩვენი თვითმყოფადობის ძირითადი საყრდენი.

შესაბამისად, სანამ ამ ყველაფერთან დაკავშირებით თვითონ გულწრფელ ბოდიშს არ მოიხდის, შეუძლებელია, რომ ჩვენი მხრიდან რაიმე ნაბიჯი გადაიდგას და რაიმე ტიპის შეხვედრაზე დავთანხმდეთ”, - აღნიშნა მაჭავარიანმა.

ცნობისთვის, გერმანიის ბუნდესტაგის საგარეო საქმეთა კომიტეტის თავმჯდომარე, მიხაილ როთი საქართველოშია. მან რამდენიმე დღის წინ გაავრცელა ინფორმაცია, რომ 16-18 სექტემბერს საქართველოსა და სომხეთს ეწვეოდა.