მნიშვნელობა არ აქვს, რა ტიპის ზიზღი და ბოღმა გააჩნიათ გახარიას და ხაზარაძეს ერთმანეთის მიმართ, მიიღებენ დავალებას და ვალდებულები არიან, კითხვის დასმის გარეშე შეასრულონ, - ამის შესახებ "ქართული ოცნების" დეპუტატმა, ლევან მაჭავარიანმა განაცხადა, რითაც გახარია-ხაზარაძის შესაძლო გაერთიანებაზე დასმულ კითხვას უპასუხა.

მისი თქმით, დიდი ალბათობით, გახარია-ხაზარაძის გაერთიანება საპარლამენტო არჩევნებში ბარიერს ვერ გადალახავს.

„ქალბატონი ზურაბიშვილი არის რადიკალური ოპოზიციის პრეზიდენტი. „ნაციონალურმა მოძრაობამ“ იგი იმპიჩმენტისგან იხსნა და რადიკალების ლიდერად მოგვევლინა. იგი არღვევს ჩვენი ქვეყნის კონსტიტუციას და კონსტიტუციას არ სცემს პატივს. რაც შეეხება ბატონი ხაზარაძისა და ბატონი გახარიას დიდ შერიგებას - რა თქმა უნდა, ღიმილისმომგვრელია თუ ისინი ამ ნაბიჯს გადადგამენ. მათი გარე უფროსები კარგად ითვლიან მათ რეიტინგებს. გიორგი გახარიას ბარიერის გადალახვის ნულოვანი შანსი აქვს, 3%-თანაც არ ²არის ახლოს. ბატონ ხაზარაძეს აქვს რაღაცა შანსი. ხან 5%-ზეა, ხან 5.5%-ზე, ხან 4%-ზე ჩამოდის. შესაბამისად, მათი გარე უცხოელი უფროსები ამით ცდილობენ, რომ გადააზღვიონ თემა, ისინი ერთად დააჯგუფონ. მნიშვნელობა არ აქვს, რა ტიპის ზიზღი და ბოღმა გააჩნიათ გახარიას და ხაზარაძეს ერთმანეთის მიმართ, მიიღებენ დავალებას და ვალდებულები არიან, რომ კითხვის დასმის გარეშე შეასრულონ ეს დავალება”, - განაცხადა მაჭავარიანმა.