ეს არის რაღაც იაფფასიანი შანტაჟის მცდელობა - უნდათ, ხალხს მიაწოდონ ინფორმაცია იმასთან დაკავშირებით, რომ თუ ქართული საზოგადოება ხელისუფლებაში არ დააბრუნებს სისხლიან რეჟიმს, „კოლექტიურ ნაცმოძრაობას“, ამ შემთხვევაში, დაისჯება საზოგადოება, - ასე გამოეხმაურა საქართველოს პრემიერ-მინისტრი ირაკლი კობახიძე ტელეკომპანია „ფორმულას“ ინფორმაციას იმასთან დაკავშირებით, რომ „EU-ში მიღწეულია შეთანხმება უვიზოს შეჩერებაზე დემოკრატიის უკუსვლის კვალდაკვალ“.

კობახიძის განცხადებით, ასეთ შანტაჟს მკაფიო პასუხს გასცემს ქართული საზოგადოება 26 ოქტომბერს.

„რეალურად არ ვიცი, ეს არის რაღაც იაფფასიანი შანტაჟის მცდელობა - უნდათ, ხალხს მიაწოდონ ინფორმაცია იმასთან დაკავშირებით, რომ თუ ქართული საზოგადოება ხელისუფლებაში არ დააბრუნებს სისხლიან რეჟიმს, „კოლექტიურ ნაცმოძრაობას“, ამ შემთხვევაში, დაისჯება საზოგადოება - ეს არის მესიჯი. ამ მესიჯს ავრცელებს ტელეკომპანია „ფორმულა“. ეს არის რაღაც იაფფასიანი შანტაჟი, რომელსაც ფასი ვერ ექნება საარჩევნოდ, ქართული საზოგადოება ასეთ შანტაჟს კიდევ უფრო მკაფიო პასუხს გასცემს 26 ოქტომბერს.“-განაცხადა კობახიძემ.

ცნობისთვის, „ფორმულას“ ინფორმაციით, ევროკავშირის დონეზე ფაქტობრივად მიღწეულია შეთანხმება არჩევნების შემდეგ საქართველოსთვის უვიზო მიმოსვლის შეჩერების შესახებ, ვითარების შემდგომი გაუარესებისა და დემოკრატიული პრინციპების, მათ შორის თავისუფალი არჩევნების პრინციპის დარღვევის შემთხვევაში.