საქართველოს ტექნიკური უნივერსიტეტის სპორტსმენებმა აჭარის ფრენბურთის ფედერაციის ორგანიზებული საერთაშორისო ტურნირის - „კორტების მეფეები“, ოქროს გვირგვინი მოიპოვეს.

ამის შესახებ ინფორმაციას სტუ ავრცელებს.

მითივე ცნობით, ბათუმის ქვიშის მოედანზე დასრულდა ტურნირი ფრენბურთში - „კორტის მეფეები 2024“, რომლის გამარჯვებული, საქართველოს ტექნიკური უნივერსიტეტის სპორტული წყვილი პეტრე ლობჟანიძის და დანიელ ხეირაბადის შემადგენლობით, გახდა.

როგორც სტუ-ის სტუდენტური სერვისების, კულტურისა და სპორტის დეპარტამენტის სპორტის განყოფილების ხელმძღვანელი აცხადებს, საქართველოს ტექნიკური უნივერსიტეტის სტუდენტები აქტიურად არიან ჩართული სპორტის სხვადასხვა სახეობებში და წარმატებულად ასპარეზობენ შიდა თუ საერთაშორისო ტურნირებში.

არჩილ იოსელიანის თქმით, პეტრე ლობჟანიძემ და დანიელ ხეირაბადმა ქალაქ ბათუმში გამართულ საერთაშორისო ტურნირზე - „კორტის მეფეები 2024“, რომელშიც მონაწილეობას იღებდა 6 ქვეყნის 28 წყვილი, დაძაბულ ფინალურ ბრძოლაში მოახერხეს ზაქაიძე/ქაჩიბაიას წყვილის დამარცხება.

„16 სექტემბერს, საქართველოს ტექნიკურ უნივერსიტეტში ახალი სასწავლო წელი დაიწყო. ვულოცავ პირველკურსელებს ცხოვრების ახალი ეტაპის დაწყებას და ყველა სტუდენტს წარმატებას ვუსურვებ. ჩვენ უკვე მთელი სასწავლო წლის სპორტული აქტივობები დაგეგმილი გვაქვს. სექტემბრის ბოლოს ჩატარდება სამდღიანი საერთაშორისო ტურნირი ქვიშის ფრენბურთში, სადაც იასპარეზებენ 10 ქვეყნის უნივერსიტეტების სპორტული გუნდები”, - აცხადებს არჩილ იოსელიანი.