ვინ ეკითხება ან მამუკა ხაზარაძეს ან გიორგი გახარიას რამეზე შეთანხმდებიან თუ არა - ისინი მაშინ გაერთიანდებიან და მაშინ დაიშლებიან, როცა ბრძანებას მიიღებენ! ბრძანება მათთვის არის მორჩილების ტოლფასი, - ამის შესახებ ჟურნალისტებს „ქართული ოცნების“ დეპუტატმა რატი იონათამიშვილმა განუცხადა.

იონათამიშვილმა თქვა ისიც, რომ ამ ადამიანებს პირადი აზრი, პირადი პოზიცია და პირადი „მე“ არ გააჩნიათ.

„ისინი მაშინ გაერთიანდებიან და მაშინ დაიშლებიან, როცა ამის ბრძანებას მიიღებენ - ამ ბრძანების მონურ მორჩილებაში არიან! ეს ყველაფერი მათ უკან დაიდგა და იმითაც ატყუებენ საზოგადოებას, თითქოს რაღაცაზე ვერ თანხმდებიან. ვინ ეკითხება ან ერთს ან მეორეს რამეზე შეთანხმდებიან თუ არა - ბრძანება მათთვის არის მორჩილების ტოლფასი.

ისინი არიან მორჩილი ადამიანები, რომელთაც არანაირი „მე“ და არანაირი პოზიცია არ გააჩნიათ. ამიტომაც არის სამარცხვინო მთლიანად ეს რადიკალური ოპოზიცია“, - განაცხადა რატი იონათამიშვილმა.

პრეზიდენტის რეზიდენციაში სალომე ზურაბიშვილის ინიციატივით გამართული სამდღიანი მოლაპარაკებების შემდეგ, 19 სექტემბერს, ცნობილი გახდა, რომ პოლიტიკურ ჯგუფებს „გახარია საქართველოსთვის“ და „ძლიერ საქართველოს“ შორის გაერთიანებაზე შეთანხმება ვერ შედგა.