რა შეიძლება იყოს იმაზე მძიმე ბრალდება, რაც საქართველოს ხელისუფლების მიმართ ითქვა, რომ „ეს თაღლითები, თურმე ქართველმა ხალხმა უნდა მოიშოროს“, ეს ამერიკის სენატის წევრმა თქვა - ამაზე მძიმე და ამასთან ახლოს მყოფიც კი არასდროს გვითქვამს, ანუ, საკითხი პირიქითაა - როგორ შეგვხედავენ თვალებში, როდესაც ასეთი განცხადებები კეთდება ქართველი ხალხის მიერ არჩეული ხელისუფლების მიმართ?!- ასე უპასუხა „ქართული ოცნების“ პოლიტსაბჭოს წევრმა და პარლამენტის თავმჯდომარე შალვა პაპუაშვილმა ჟურნალისტის კითხვას, როგორ შეხვდებიან ამერიკის შეერთებული შტატებში საქართველოს პრემიერ-მინისტრს იმ ბრალდებების შემდეგ, რასაც „ქართული ოცნება“ დასავლეთის მისამართით აჟღერებს.

როგორც პაპუაშვილმა აღნიშნა, როგორც ქვეყნის შიგნით, ისე გარეთ, „ზოგიერთი ძალიან გაერთო რუსული სტილის ნარატივით, რომელიც ხელისუფლებას და ხალხს ყოფს“.

„გვახსოვს უკრაინასთან მიმართებით რუსეთის დამოკიდებულება, რომ ცალკე არის მთავრობა, რომელიც უკრაინელ ხალხს არ წარმოადგენს. ზოგიერთი - შინაც და გარეთაც ამ რუსული სტილის ნარატივით ძალიან გაერთო, როდესაც საუბრობს ქართველ ხალხზე და იმაზე, რომ თითქოს, საქართველოს ხელისუფლება რაღაც გამჭვირვალე შუშაა და ხალხს იმის იქით ხედავენ. საქართველოს ხელისუფლება ქართველი ხალხის მიერ დემოკრატიულად არჩეული ხალხის წარმომადგენელია. ამიტომ, ქვეყნების ერთმანეთთან საუბრის დროს ხელისუფლება - ხელისუფლებასთან საუბრობს. როდესაც ერთ ქვეყანას აქვს პრეტენზია, მეორე ქვეყნის ხელისუფლებას თავზე გადაახტეს და ესაუბროს ხალხს, ამას სხვა ტერმინოლოგია ჰქვია ისტორიაშიც და საერთაშორისო სამართალშიც. ხოლო, რასაც ღირებულებები ჰქვია, ეს ასახულია გაეროს წესდებაში, რომელიც „ჩაურევლობის პრინციპს“ ამკვიდრებს“,- განაცხადა შალვა პაპუაშვილმა.