პარლამენტის ოპოზიციონერი დეპუტატი თეონა აქუბარდია ადასტურებს, რომ ევროპის საბჭოს სადამკვირვებლო მისიის წევრებთან შეხვედრისას, დელეგაციის ერთ-ერთი წევრის მხრიდან შედარება ბელორუსთან გაკეთდა.

აქვე აქუბარდიამ აღნიშნა, რომ საქართველოს ბელორუსი არასდროს გახდება, რადგან მოსახლეობა საკუთარი ცივილიზაციური არჩევანის წინააღმდეგ ხმას არასდროს მისცემს.

“ეს შედარება იყო - ბუნებრივია, თუ არჩევნები არ იქნება თავისუფალი, სამართლიანი, პირველი რაც ყველას ახსენდება, ეს არის ბელარუსი.

მათგან გაკეთდა მნიშვნელოვანი განცხადება იმის თაობაზე, რომ მხარს საქართველოს დემოკრატიას უჭერენ. ყველა ჩვენს მეგობარს გათვიცნობიერებიული აქვს, რომ ეს არჩევნები კრიტიკულად მნიშვნელოვანია, რათა ხალხის ნება, ვუცხოვროთ დემოკრატიულ და ევროპულ სახელმწიფოში, იყოს დაცული“, - განაცხადა თეონა აქუბარდიამ.

პარლამენტში, საპარლამენტო ოპოზიციის წევრები ევროპის საბჭოს სადამკვირვებლო მისიის წევრებს შეხვდნენ.

ევროსაბჭოს დელეგაციასთან შეხვედრაზე იმყოფებიან დეპუტატები: ანა ნაცვლიშვილი, ხატია დეკანოიძე, ჰერმან საბო, თეონა აქუბარდია, თამარ კორძაია, ხათუნა სამნიძე. საპარლამენტო ოპოზიციის ინფორმაციით, საუბარი შეეხებოდა საარჩევნოდ გამოვლენილ დარღვევებს, ფიზიკურ ძალადობას, საარჩევნო კომისიების დაკომპლექტების მხრივ არსებულ პრობლემებს და ქვეყანაში არსებულ საარჩევნო კლიმატს.