როდესაც დასავლური სამყარო რუსეთთან იმის გამოა დაპირისპირებული, რომ რუსეთი გაერო-ს წესდებით გათვალისწინებულ ჩაურევლობის პრინციპს არღვევს და სხვა ქვეყნის შიდა საკითხებში ერევა, თავად არ უნდა იქცეოდე ისე, რის წინააღმდეგაც სიტყვით იბრძვი! - მოვუწოდებ ყველას, მინიმუმ იმ სტანდარტში მაინც ჩაეტიონ, რა სტანდარტსაც სხვებს უყენებენ! - ეს განცხადება მედიასთან დღეს, პარლამენტის თავმჯდომარემ შალვა პაპუაშვილმა გააკეთა.

პაპუაშვილის თქმით, ამერიკელი და ევროპელი პოლიტიკოსების მხრიდან ადგილი აქვს საქართველოს შიდა პოლიტიკურ საკითხებსა და საარჩევნო პროცესში ჩარევას, რაც მისივე აზრით, „მხოლოდ პოლიტიკური ესთეტიკის საკითხი არ არის“.

„გარე ჩარევასთან დაკავშირებით გავასაჯაროვეთ 21 დღის განმავლობაში გაკეთებული 90 განცხადება - აიღონ ეს განცხადებები, ევროპელი და ამერიკელი პოლიტიკოსების სახელები და გვარები რუსული სახელითა და გვარით შეცვალონ და შემდეგ დაფიქრდნენ, ამას უწოდებენ თუ არა ჩარევას.

რა თქმა უნდა, ადგილი აქვს საარჩევნო პროცესში ჩარევას, რაც მხოლოდ პოლიტიკური ესთეტიკის საკითხი არ არის. ეს გახლავთ საერთაშორისო სამართლის ერთ-ერთი ფუძემდებლური პრინციპის - ჩაურევლობის პრინციპის დარღვევაა, რაც გაერო-ს წესდებითაა გარანტირებული.

ადგილი აქვს პირდაპირ ჩარევას საქართველოს შიდა პოლიტიკურ საკითხებში - უცხოელი პოლიტიკოსები ჩამოდიან და ამა თუ იმ მხარის პოლიტიკურ პოზიციებს იკავებენ. ეს არის ამომრჩეველზე და ამომრჩევლის ნების ფორმირებაზე გავლენა, რაც ანტიდემოკრატიული ქმედებაა.

მოვუწოდებ ყველას, მინიმუმ იმ სტანდარტში მაინც ჩაეტიონ, რა სტანდარტსაც სხვებს უყენებენ, რათა დავრწმუნდეთ, რომ ეს სტანდარტები კეთილსინდისიერად არის წამოყენებული და არა ფარისევლურად“, - განაცხადა შალვა პაპუაშვილმა.