საფრანგეთი, უახლოეს მომავალში, უკრაინულ ბრიგადას მოამზადებს და სრულად აღჭურავს, - ამის შესახებ საფრანგეთისა და უკრაინის პრეზიდენტების, ვოლოდიმირ ზელენსკისა და ემანუელ მაკრონის შეხვედრის შემდეგ გახდა ცნობილი.

შეხვედრის დროს ზელენსკიმ და მაკრონმა განიხილეს უკრაინის საჰაერო თავდაცვის სისტემის შემდგომი გაძლიერება საფრანგეთის დახმარებით და სამხედრო წვრთნები.

კერძოდ, ცნობილი გახდა, რომ უახლოეს მომავალში ქვეყანა უკრაინულ ბრიგადას მოამზადებს და სრულად აღჭურავს.

საფრანგეთისა და უკრაინის ლიდერებმა ასევე განიხილეს ბოლო დროს ჩატარებული თემატური კონფერენციების შედეგები მშვიდობის ფორმულის ცალკეულ პუნქტებზე დაყრდნობით და ბირთვული უსაფრთხოების შეხვედრისთვის მზადება. ასევე ყურადღება გაამახვილეს მეორე სამშვიდობო სამიტის მომზადებაზე.

ზელენსკიმ მადლობა გადაუხადა საფრანგეთს უკრაინის ნატო-სა და ევროკავშირში გაწევრიანების გზაზე მტკიცე მხარდაჭერისთვის, ასევე სამხედრო დახმარებისთვის და აღნიშნა, რომ მოუთმენლად ელის ყოვლისმომცველ თანამშრომლობას ქვეყნის ახალ მთავრობასთან.