„ქართული ოცნებისგან“ განსხვავებით, რომელიც მიეყიდა და ბოლომდე ჩაბარდა ოკუპანტ რუსეთს, ჩვენი გუნდის, „ძლიერი საქართველოს“ მთავარი ამოცანა იქნება ის, რომ ვემსახუროთ ჩვენ ქვეყანას და მის თითოეულ მოქალაქეს, - ამის შესახებ კოალიცია „ძლიერი საქართველოს“ წევრმა, ანა ნაცვლიშვილმა ჟურნალისტებს განუცხადა.

მისი თქმით, დღეს, „ძლიერმა საქართველომ“ საარჩევნო სიის სახით საქართველოს თითოეულ მოქალაქეს წარუდგინა პატრიოტი, კომპეტენტური, ენერგიული, გამარჯვების სია.

„ესენი არიან ადამიანები, რომლებსაც აქვთ ყველა თვისება, უნარი, რომ ქვეყანა დააბრუნონ ევროპული და ევროატლანტიკური განვითარების გზაზე. საქართველოს თითოეულ მოქალაქეს გავუჩინოთ განცდა, რომ მის გვერდით ჭირსა თუ ლხინში დგას ძლიერი სახელმწიფო, რომელიც იცავს და ზრუნავს თითოეულ მოქალაქეზე. ძლიერი სახელმწიფო და ძლიერი გუნდი, რომელიც ამ ქვეყანაში შექმნის სამართლიანი ანაზღაურებით 200 000 სამუშაო ადგილს, თითოეული ხანდაზმული ადამიანისთვის 1 000 ლარიან პენსიას. ეს არის გუნდი, რომელიც ამ ქვეყანაში აუცილებლად ააშენებს ანაკლიის პორტს, ქალაქს და ეს პროექტი საქართველოსთვის მოიტანს არამხოლოდ ეკონომიკურ წინსვლას, არამედ საქართველოს გადააქცევს უმნიშვნელოვანეს გლობალურ მოთამაშედ“, - განაცხადა ანა ნაცვლიშვილმა.