საქართველოს სახელმწიფო საზღვრის უკანონო კვეთაში ბრალდებული ყოფილი პრეზიდენტი, მიხეილ სააკაშვილი კვლავ პატიმრობაში რჩება.

დღევანდელ სასამართლო პროცესზე ყოფილი პრეზიდენტის ადვოკატმა, ბექა ბასილაიამ ბრალდებულის მიმართ აღკვეთის ღონისძიების სახით შეფარდებული პატიმრობის გაუქმების შუამდგომლობა დააყენა.

ადვოკატის განმარტებით, მართალია, ახლა სააკაშვილის გათავისუფლება-არ გათავისუფლების საკითხი არ წყდებოდა, თუმცა ნებისმიერი დრო, რასაც ყოფილი პრეზიდენტი პენიტენციურ დაწესებულებაში ატარებს, არაკონსტიტუციურია.

ადვოკატი ასაბუთებდა, რომ იმის ფონზე, როცა სააკაშვილს სხვა საქმეებზე სასჯელი მისჯილი აქვს და ის პენიტენციურ დაწესებულებაში სასჯელს იხდის, მის მიმართ აღკვეთის ღონისძიების სახით პატიმრობის გამოყენება არაგონივრული და არაკანონიერია.

ბრალდების მხარე დაცვის მხარის შუამდგომლობას არ დაეთანხმა და განმარტა, რომ ადვოკატის შუამდგომლობა დაუსაბუთებელია და ბრალდებულ სააკაშვილის პატიმრობა ძალაში უნდა დარჩენილიყო.

მოსამართლე მიხეილ ჯინჯოლიამ დაცვის მხარის შუამდგომლობა არ დააკმაყოფილა. ჯინჯოლიას განმარტებით, სასამართლოს მიაჩნია, რომ დაცვის მხარის მიერ გაჟღერებული, საკონსტიტუციო სასამართლოს 2015 წლის გადაწყვეტილება, სხვა ფაქტობრივ გარემოებებს ეხება. მოსამართლის გადაწყვეტილებითვე, სააკაშვილისთვის შეფარდებული აღკვეთის ღონისძიება ძალაში დარჩა.

დღევანდელ სასამართლო პროცესზე ბრალდების მხარემ შესავალი სიტყვა წარმოთქვა. დაცვის მხარემ კი განაცხადა, რომ შესავალ სიტყვას მომდევნო სხდომაზე იტყვიან.

ცნობისთვის, მიხეილ სააკაშვილის მიერ საზღვრის უკანონო კვეთის ფაქტთან დაკავშირებით გამოძიება 2021 წლის პირველ ოქტომბერს დაიწყო. აღნიშნული საქმის ფარგლებში ბრალდება კიდევ 4 პირს - ელგუჯა ცომაიას, ზურაბ და შალვა წოწორიებსა და გიორგი ნარიმანიძეს აქვთ წაყენებული. აღნიშნული საქმე ცალკე წარმოებად მიმდინარეობს, ისინი გირაოს სანაცვლოდ არიან გათავისუფლებულები.