კრემლი უკვე სხვა მეთოდებით აგრძელებს საქართველოს ოკუპაციას. სამწუხაროდ, ანექსიის პროცესი გრძელდება, - ამის შესახებ პარტია „ევროპელი დემოკრატების“ თავმჯდომარე პაატა დავითაიამ განაცხადა.

მისი თქმით, ყველაფერი უნდა გაკეთდეს ტერიტორიული მთლიანობის აღდგენისთვის და იმ მსხვერპლთა ხსოვნისთვის, რომელიც ქვეყანამ ომში გაიღო.

„დღეს საქართველოს უახლესი ისტორიის უმძიმესი დღეა. სოხუმის დაცემა, ჩვენი ტერიტორიების ოკუპაცია და ათასობით გარდაცვლილი ადამიანი, ვისი სიცოცხლეც ქვეყნის ერთიანობისთვის ბრძოლას შეეწირა. ჩვენ ყველაფერი უნდა გავაკეთოთ იმისთვის, რომ აღდგეს ტერიტორიული მთლიანობა და მსხვერპლი, რომელიც ამ ომს მოჰყვა, ფუჭად არ იყოს გაღებული.

კრემლი უკვე სხვა მეთოდებით აგრძელებს საქართველოს ოკუპაციას. სამწუხაროდ, ანექსიის პროცესი გრძელდება. ოკუპანტი რუსეთი ყველაფერს აკეთებს იმისთვის, რომ საქართველოს ოკუპირებული ტერიტორიები უკვე იურიდიულად მიუერთოს რუსეთის ფედერაციას.

სამწუხაროა, რომ ამ 31 წლის განმავლობაში არც ერთ ხელისუფლებას არ ჰქონია თანმიმდევრული გეგმა და სტრატეგია ჩვენს ოკუპირებულ ტერიტორიებთან დაკავშირებით და აფხაზეთის თემა არჩევნებიდან არჩევნებამდე ხდება პოლიტიკური ძალებისთვის პიარ-კამპანიის ნაწილი, რაც ხშირად ანტისახელმწიფოებრივ სახეს იღებს“, - აცხადებს პაატა დავითაია.

აღნიშნულ კომენტარს პარტია „ევროპელი დემოკრატები“ ავრცელებს.