ბატონი სალივანის განცხადება კიდევ ერთხელ, მკაფიოდ გვეუბნება, რომ ქვეყანას მართავს ქართველი ერის ინტერესების მოღალატე რეჟიმი, რომელმაც ისეთ დონემდე მიიყვანა ჩვენს მთავარ სტრატეგიულ პარტნიორთან ურთიერთობა, რომ ხელსაც კი არ ართმევენ, - ამის შესახებ „ერთიანი ნაციონალური მოძრაობის“ პოლიტიკურმა მდივანმა გიორგი ბარამიძემ განაცხადა.

მისი თქმით, ამერიკისა და ევროკავშირის დიდი ძალისხმევაზე დგას საქართველოს ოკუპირებული ტერიტორიების არაღიარების პოლიტიკა

„ქართულ ოცნებას“ ხელსაც კი არ ართმევენ, არ პატიჟებენ ისეთ, ფორმალურ მიღებაზეც კი, სადაც ასობით ქვეყნის დელეგაციაა, მათ შორის ისეთი ქვეყნებისაც, რომლებიც დიდი დემოკრატიულობით ვერ გამოირჩევიან, მაგრამ მათ შორისაც რომ ვერ ხვდება, აბსოლუტურად არ არის საჭირო დიდი პოლიტიკოსობა, რათა დავასკვნათ, თუ რა დონემდეა დაყვანილი ქართულ-ამერიკული ურთიერთობები. მინდა შევახსენო ყველას, რომ ეს ის ამერიკაა, ევროკავშირთან ერთად, რომლის ძალიან დიდ ძალისხმევაზე დგას საქართველოს ოკუპირებული ტერიტორიების არაღიარების პოლიტიკა.

საქართველოს იმ დროებით ოკუპირებული ტერიტორიების, რომელთა საერთაშორისო აღიარებასაც ცდილობდა რუსეთი და რომელმაც ეს ვერ შეძლო, მიუხედავად დიდი ფინანსური თუ პოლიტიკური ძალისხმევისა. სწორედ აშშ ევროკავშირთან ერთად იყო ამ პროცესების ლიდერი, რომელმაც დაიცვა საქართველოს ტერიტორიული მთლიანობა.

ამ მოღალატურმა რეჟიმმა კი მდგომარეობა იქამდე მიიყვანა, რომ ჩვენ კოკოითიც კი დაგვცინის, რომელიც გვეუბნება, რომ თქვენ არამარტო ბოდიში უნდა მოიხადოთ, არამედ თრუსოს ხეობა და გუდაურიც უნდა დაგვიბრუნოთო“, - განაცხადა „ერთიანი ნაციონალური მოძრაობის“ პოლიტიკურმა მდივანმა გიორგი ბარამიძემ.

ცნობისთვის, აშშ-ის სახელმწიფო მდივნის, ენტონი ბლინკენის მრჩეველმა ტომ სალივანმა ბრიფინგზე განაცხადა, რომ უკვე გარკვეული პერიოდია, რაც შეშფოთებულები არიან იმ ტრაექტორიით, რომლითაც პარტია „ქართულ ოცნებას“ თავისი ქვეყანა მიჰყავს. როგორც სალივანმა აღნიშნა, „ოცნების“ ეს ტრაექტორია ქართველ ხალხს დასავლეთთან, ევროკავშირთან და პოტენციურად ნატო-სთან უფრო მჭიდრო ინტეგრაციასთან აშორებს.