თბილისის მერიის გარემოს დაცვის საქალაქო სამსახურმა, ვაჟა-ფშაველას გამზირზე, პირველ კვარტალში, ციციშვილის პარკის რეაბილიტაცია დაასრულა. ინფორმაციას თბილისის მერია ავრცელებს. მათივე ცნობით, სარეაბილიტაციო სამუშაოები ორ ეტაპად განხორციელდა.

"გასულ 2023 წელს დასრულდა პირველი ეტაპის სამუშაოები, ხოლო მიმდინარე წელს სრულად რეაბილიტირდა პარკი, რომლის საერთო ფართობი 24 600 კვადრატულ მეტრს შეადგენს.

რეაბილიტაციის ფარგლებში, მოეწყო 3 საბავშვო მოედანი, 2 სავარჯიშო სივრცე, სრულიად განახლდა საფეხბურთო მოედანი, შეიცვალა კალათბურთის მოედნის ფურნიტურა, მოეწყო 6 ფანჩატური, 5 ორდონიანი სასმელი წყლის სოკო, განთავსდა ახალი სკამები და ურნები. ასევე, მოეწყო გარე განათებისა და ვიდეომეთვალყურეობის სისტემები.

პარკში ჩატარდა გამწვანების მასშტაბური სამუშაოები: მოეწყო სარწყავი სისტემა, დაირგო 4 563 ძირი სხვადასხვა სახეობის მწვანე ნარგავი, 14 653 კვ. მ ფართობზე დაითესა ბალახის საფარი", - აღნიშნულია თბილისის მერიის მიერ გავრცელებულ ინფორმაციაში.