ლიბანის საზღვართან დახურული სამხედრო ზონები დაწესდა, - ამის შესახებ განცხადებას ისრაელის თავდაცვის ძალები ავრცელებს.

„ჩრდილოეთ ისრაელში მეტულის, მისგავ ამისა და კფარ გილადის ტერიტორიები დახურულ სამხედრო ზონებად გამოცხადდა. ამ ტერიტორიაზე შესვლა აკრძალულია“, - ნათქვამია ისრაელის თავდაცვის ძალების განცხადებაში.

ცნობისთვის, მედიაში ისრაელის მიერ ლიბანში სახმელეთო ოპერაციის შესაძლო დაწყების შესახებ ინფორმაცია ვრცელდება. აშშ-ის სახელმწიფო დეპარტამენტის პრესსპიკერმა, მეთიუ მილერმა განაცხადა, რომ ისრაელმა აშშ-ს „ჰეზბოლას“ ინფრასტრუქტურის წინააღმდეგ მიმართული მცირე მასშტაბის ოპერაციების შესახებ აცნობა.