რეგიონული განვითარებისა და ინფრასტრუქტურის სამინისტროს გაერთიანებული წყალმომარაგების კომპანია ქალაქ ბორჯომსა და ბორჯომის მუნიციპალიტეტის დასახლებებში 6 პროექტს ახორციელებს, რომელთა ჯამური ღირებულება 186.5 მილიონ ლარამდეა.

რეგიონული განვითარებისა და ინფრასტრუქტურის სამინისტროს ინფორმაციით, პროექტები, ეტაპობრივად, 2025-2026 წლებში დასრულდება და შედეგად, 44 ათასამდე ბენეფიციარი ახალი ინფრასტრუქტურითა და 24 საათიანი უწყვეტი წყალმომარაგებით ისარგებლებს.

უწყების ცნობით, 2023 წელს დაბა ბაკურიანში 5 მილიონი ლარის ღირებულების წყალმომარაგების სისტემის მშენებლობის 4 პროექტი განხორციელდა. შედეგად, დაბა ბაკურიანის 10 800-მდე ბენეფიციარი უკვე სარგებლობს 24 საათიანი უწყვეტი წყალმომარაგებით.

როგორც სამინისტროს მიერ გავრცელებულ ინფორმაციაშია აღნიშნული, კურორტის განვითარებისა და დამსვენებლების რაოდენობის ზრდის გათვალისწინებით, წყალმომარაგებისა და წყალარინების ინფრასტრუქტურის ოპტიმიზაციისათვის დაიწყო 3 პროექტი. პროექტების ფარგლებში, სრულად განახლდება წყალმომარაგებისა და წყალარინების ქსელები, მნიშვნელოვნად გაიზრდება წყლის დებიტი, მოეწყობა რეზერვუარები, სატუმბი სადგურები და აღრიცხვის კვანძები. ასევე, რეაბილიტაცია ჩაუტარდება და აშენდება ყველა საჭირო ინფრასტრუქტურა.

სამუშაოები სახელმწიფო ბიუჯეტიდან ფინანსდება და მათი ჯამური ღირებულება 150 მილიონ ლარამდეა.

ბაკურიანში მიმდინარე სამუშაოები რეგიონული განვითარებისა და ინფრასტრუქტურის მინისტრმა, ირაკლი ქარსელაძემ გაერთიანებული წყალმომარაგების კომპანიის აღმასრულებელ დირექტორთან, ალექსანდრე თევდორაძესთან და ადგილობრივი ხელისუფლების წარმომადგენლებთან ერთად მოინახულა.

„ბაკურიანსა და ბორჯომში მიმდინარეობს წყალმომარაგებისა და წყალარინების უმნიშვნელოვანესი პროექტები. სამუშაოების დასრულების შემდეგ, ბაკურიანს ექნება 24 საათიანი წყალმომარაგება განახლებული ინფრასტრუქტურით. გრძელდება წყალარინების პროექტები და გათვალისწინებულია გამწმენდი ნაგებობის მშენებლობაც. ასევე, სრულფასოვანი წყალმომარაგება ექნება ბორჯომის მუნიციპალიტეტის სოფლებს - სადგერსა და ლიკანს. აღნიშნული პროექტები მნიშვნელოვანია, როგორც მოსახლეობის წყალმომარაგებისათვის, ისე ბორჯომისა და ბაკურიანის პერსპექტიული განვითარებისთვის, რომელსაც სრულად უპასუხებს გაზრდილი წყლის დებეტი და სრულყოფილი ინფრასტრუქტურა“, - განაცხადა ირაკლი ქარსელაძემ მიმდინარე სამუშაოების დათვალიერების შემდეგ.

უწყების ინფორმაციით, დაბა ბაკურიანში წყალმომარაგებისა და წყალარინების ინფრასტრუქტურის სამშენებლო სამუშაოების დასრულება 2026 წელს იგეგმება. გაერთიანებული წყალმომარაგების კომპანია უახლოეს მომავალში კურორტზე თანამედროვე სტანდარტების შესაბამისი წყალარინების გამწმენდი ნაგებობის მშენებლობას გეგმავს, რომელიც ექსპლუატაციაში შესვლის შემდეგ, ჩამდინარე წყლების წმენდას სრული ბიოლოგიური ციკლის დაცვით განახორციელებს, რაც მნიშვნელოვნად შეამცირებს გარემოზე მავნე ზემოქმედებას.