პარტია „ევროპელი დემოკრატების“ თავმჯდომარე პაატა დავითაია და პოლიტიკური საბჭოს თავმჯდომარე ნიკოლოზ ვაშაკიძე ვარშავისუსაფრთხოების ფორუმში იღებენ მონაწილეობას, სადაც ისინი ფორუმის ორგანიზატორების მოწვევით იმყოფებიან.

პარტია „ევროპელი დემოკრატების“ ინფორმაციით, ვარშავის უსაფრთხოების ფორუმი არის წამყვანი ევროპული პლატფორმა, რომელიც 2014 წლიდან ტრადიციულად ყოველ წელს იმართება.

„ფორუმში აშშ-ს და ევროპის სხვადასხვა ქვეყნების პოლიტიკოსები, სამხედრო, უსაფრთხოებისა და საგარეო უწყებების მაღალი დონის წარმომადგენლები მონაწილეობენ. წელს ვარშავის უსაფრთხოების ფორუმი ვარშავაში 1-2 ოქტომბერს გაიმართება. ფორუმზე წამყვან საკითხთა შორისაა შავი ზღვის რეგიონის უსაფრთხოების კონცეფცია და სტრატეგიის შემუშავება“, - აღნიშნულია ინფორმაციაში.

როგორც პაატა დავითაიამ აღნიშნა, აქტიურ მონაწილეობას მიიღებენ ფორუმსა და დისკუსიებში.

„მსგავს ფორმატებში მონაწილეობა და შეხვედრები ფორუმის მონაწილეებთან განსაკუთრებით მნიშვნელოვანია ჩვენთვის, როგორც ქვეყნის წარმომადგენელებისთვის, რომელსაც დიდი გამოწვევები აქვს და რისკები საერთაშორისო ურთიერთობების, უსაფრთხოების, თავდაცვის მიმართულებით. ჩვენ აქტიურ მონაწილეობას მივიღებთ როგორც ფორუმში, ასევე დისკუსიებში, რომელიც გაიმართება ფორუმის ფარგლებში“, - აცხადებს პაატა დავითაია.