თურქეთი სამხრეთ ლიბანში ისრაელის სახმელეთო ჯარების შესვლას გმობს და უკანონო შეჭრის მცდელობად აფასებს.

თურქეთის საგარეო საქმეთა სამინისტროს განცხადებაში აღნიშნულია, რომ ისრაელმა თავდასხმა დაუყოვნებლივ უნდა შეწყვიტოს და ლიბანიდან ჯარები გაიყვანოს.

უწყების მტკიცებით, ისრაელის შეჭრა საფრთხეს უქმნის ქვეყნების უსაფრთხოებასა და სტაბილურობას რეგიონში და მის ფარგლებს გარეთ, რაც ზრდის მიგრაციის ახალი ტალღის და ექსტრემისტული ჯგუფების აღორძინების რისკს.

თურქეთის საგარეო საქმეთა სამინისტროს განცხადებაში აღნიშნულია, რომ ქვეყნები, რომლებიც პოლიტიკურ მხარდაჭერას უწევენ და იარაღს აწვდიან ისრაელს, ასევე დაზარალდებიან.

„გაერო-ს უშიშროების საბჭომ უნდა დაიცვას საერთაშორისო სამართალი და მიიღოს აუცილებელი ზომები ამ თავდასხმის წინააღმდეგ, რომელიც მიზნად ისახავს ლიბანის ოკუპაციას. ისრაელის მიერ ჩადენილი ყველა დანაშაული ასევე არის დარტყმა საერთაშორისო სამართლისა და გაერო-ს წესდებაზე“, - ნათქვამია თურქეთის საგარეო უწყების განცხადებაში.