გიორგი კახიანი - არჩევნების შემდეგ ძალიან მალე დავუბრუნდებით მდგომარეობას, რაშიც აქამდე ვიყავით და იქნება წინსვლა ევროკავშირში ინტეგრაციის გზაზე
26 ოქტომბრის არჩევნების შემდეგ, რაც საერთაშორისო საზოგადოება დარწმუნდება, რომ ქვეყანაში ყველაზე დიდი მხარდაჭერა „ქართულ ოცნებას“ აქვს, ურთიერთობები ჩვეულებრივ გაგრძელდება - არჩევნების შემდეგ, ძალიან მალე დავუბრუნდებით მდგომარეობას, რაშიც აქამდე ვიყავით და იქნება წინსვლა ევროკავშირში ინტეგრაციის გზაზე, - ეს განცხადება პარლამენტში, პარლამენტის ვიცე-სპიკერმა გიორგი კახიანმა გააკეთა.
კახიანი დარწმუნებულია, რომ დასავლელი პარტნიორების მხრიდან სანქციებზე გახშირებული საუბარი და მათი კრიტიკული განცხადებები მხოლოდ და მხოლოდ მოახლოებულ არჩევნებს უკავშირდება, რადგან ეს ყველაფერი ოპოზიციას აძლიერებს.
კახიანმა აღნიშნა ისიც, რომ „ბიძინა ივანიშვილს არანაირი სანქცია ქვეყნის მიმართ დამოკიდებულებას არ შეაცვლევინებს და მასთან სანქციებზე საუბარი არაფრის მომცემია“.
„სულ სხვა რამ არის მიზეზი იმისა, რაც დღეს ჩვენი ქვეყნის გარშემო ხდება. რა თქმა უნდა, მიზეზი გამჭვირვალობის კანონის მიღება არ არის - ეს კანონი უკვე მოქმედებს და ხედავთ, რომ არც ერთ არასამთავრობო ორგანიზაციას თავის საქმიანობაში ხელისუფლების მხრიდან პრობლემა არ შექმნია. ისინი საქმიანობას ჩვეულებრივ აგრძელებენ. რაც დრო გავა, უფრო მეტად გამოჩნდება, რომ ეს არის კანონი, რომელიც მხოლოდ გამჭვირვალობას ემსახურება.
მიზეზი ყველაფრისა კი არის ის, რომ გარკვეული ძალები ქვეყნის გარედან ცდილობენ, რომ „კოლექტიური ნაციონალური მოძრაობა“ ხელისუფლებაში მოაბრუნონ. ეს განუხორციელებელი მისიაა და საქართველოში ეს ვერ მოხდება.
როგორც კი არჩევნები დასრულდება და დარწმუნდებიან, რომ „ქართულ ოცნებას“ საზოგადოების ყველაზე დიდი მხარდაჭერა აქვს, შეჩერებული პროცესი ჩვეულებრივ გაგრძელდება - გვექნება დიდი წინსვლა მათ შორის ევროკავშირში ინტეგრაციის თვალსაზრისით“, - განაცხადა გიორგი კახიანმა.
v-if="article.gallery" v-html="article.gallery"
