ლევან ხაბეიშვილი - ნებისმიერ დაძახილზე ბატონი რაჟდენი მზად არის, კობახიძის ნებისმიერი დავალება შეასრულოს - ცხადია, ის ინსტრუმენტია ხელისუფლების ხელში

ნებისმიერ დაძახილზე ბატონი რაჟდენი მზად არის, კობახიძის მხრიდან ნებისმიერი დავალება შეასრულოს, - ასე შეაფასა „ერთიანობა ნაციონალური მოძრაობის“ პოლიტსაბჭოს თავმჯდომარემ, ლევან ხაბეიშვილმა ანტიკორუფციული ბიუროს გადაწყვეტილება, რომელმაც „საერთაშორისო გამჭვირვალობა - საქართველოსა“ და „აირჩიე ევროპას“ „გაცხადებული საარჩევნო მიზნის მქონე სუბიექტების“ სტატუსი მოუხსნა.

როგორც ხაბეიშვილმა ჟურნალისტებს განუცხადა, ხელისუფლებისთვის ანტიკორუფციული ბიურო და მისი ხელმძღვანელი, რაჟდენ კუპრაშვილი მხოლოდ ინსტრუმენტია და მეტი არაფერი.

„რამდენიმე დღის წინ აბსოლუტურად სხვა რამეს საუბრობდა, მაგრამ კობახიძის დავალების შესაბამისად როგორ მოიქცა, ვნახეთ. ცხადია, ბატონი რაჟდენი ინსტრუმენტია ხელისუფლების ხელში და ეს სამსახური, რაც ყველამ ვნახეთ. ასევე, რაც ამ მოქმედებაში დავინახეთ, შიში შეეპარა და რიხი მოაკლდა ივანიშვილის პარტიას. სწორად ეშინიათ, 26 ოქტომბერი ახლოვდება და ეჭვი მაქვს, კიდევ უფრო ბევრი მიმართულებით გაუმძაფრდებათ შიშისა და მარცხის შეგრძნება“, - განაცხადა ხაბეიშვილმა.

შეგახსენებთ, რომ ანტიკორუფციულმა ბიურომ გააუქმა მისი გადაწყვეტილება, „საერთაშორისო გამჭვირვალობა - საქართველოსა“ და მისი აღმასრულებელი დირექტორის, ეკა გიგაურის „გაცხადებული საარჩევნო მიზნის მქონე სუბიექტებად გამოცხადების“ შესახებ. აღნიშნულის შესახებ ბიუროს საქართველოს პრემიერ-მინისტრმა მოუწოდა. უფრო კონკრეტულად, პრემიერმა ირაკლი კობახიძემ გუშინ, ანტიკორუფციულ ბიუროს მოუწოდა, „საერთაშორისო გამჭვირვალობასა" და "გაცხადებული საარჩევნო მიზნის მქონე ორგანიზაციად აღიარებულ სხვა სუბიექტებთან" დაკავშირებული გადაწყვეტილება შეცვალოს.

„სახელმწიფო ინტერესებისათვის და პირველ რიგში, საარჩევნო პროცესში გარე მანიპულაციის თავიდან ასარიდებლად მიზანშეწონილად მიმაჩნია, „საერთაშორისო გამჭვირვალობა - საქართველოს“ განცხადებული საარჩევნო მიზნის მქონე ორგანიზაციის სტატუსი მოეხსნას - მოვუწოდებ საქართველოს ანტიკორუფციულ ბიუროს გადახედოს თავის გადაწყვეტილებას აღნიშნული ორგანიზაციის და სხვა შესაბამისი სუბიექტებისთვის განცხადებული საარჩევნო მიზნის მქონე ორგანიზაციის სტატუსის შეფარდების შესახებ“,- განაცხადა კობახიძემ.

შეგახსენებთ იმასაც, რომ ანტიკორუფციული ბიუროს 24 სექტემბრის გადაწყვეტილებით, ეკა გიგაურისა და ხათუნა ლაგაზიძის ორგანიზაციები "საერთაშორისო გამჭვირვალობა - საქართველო" და "აირჩიე ევროპა" „გაცხადებული საარჩევნო მიზნის მქონე სუბიექტებად“ გამოცხადდნენ, რის გამოც მათზე „მოქალაქეთა პოლიტიკური გაერთიანებების შესახებ“ კანონი უნდა გავრცელებულიყო.