რაც უფრო მალე დატოვებენ ბიძინა ივანიშვილის ჩაძირვისთვის განწირულ გემს „ქართული ოცნების“ წარმომადგენლები, ალბათ, უფრო მალე შეძლებენ საკუთარი თავის გადარჩენას - წინააღმდეგ შემთხვევაში, მასთან ერთად ჩაიძირებიან,- ამის შესახებ „ერთიანობა - ნაციონალური მოძრაობის“ ერთ-ერთმა ლიდერმა, თამარ კორძაიამ კითხვის საპასუხოდ განაცხადა, რომლის თანახმადაც, არსებობს ინფორმაცია, რომ „ქართული ოცნების“ საპატიო თავმჯდომარის, ბიძინა ივანიშვილის შვილებს საბანკო ანგარიშებზე წვდომა შეუწყდათ.

მისივე განცხადებით, სანქციები „ცალსახად ეფექტურია“.

„ეს არის პირველი ნაბიჯი. რაც უფრო მალე დატოვებენ ბიძინა ივანიშვილის ჩაძირვისთვის განწირულ გემს „ქართული ოცნების“ წარმომადგენლები, ალბათ, უფრო მალე შეძლებენ საკუთარი თავის გადარჩენას. წინააღმდეგ შემთხვევაში, მასთან ერთად ჩაიძირებიან. ჩვენ ვხედავთ, რომ [სანქციები] ცალსახად ეფექტურია. იმიტომ, რომ ე.წ. კანონიერი გადაწყვეტილებების შეცვლა უწევთ პრემიერ-მინისტრის განცხადებებით. ჩანს, რომ ეს მოქმედებს“,- განაცხადა კორძაიამ.

როგორც კორძაიამ აღნიშნა, "რაც არ უნდა სცადოს „ქართულმა ოცნებამ", არჩევნებს წააგებს".

„მთავარი და მნიშვნელოვანი არის ის, რომ „ოცნება“ ვერ დაალაგებს ურთიერთობა საქართველოს ამომრჩეველთან. ისინი არჩევნებს აგებენ, რაც არ უნდა სცადონ, ძალიან გაუჭირდებათ“,- აცხადებს კორძაია.