მორიგი სამარცხვინო შეტევა საქართველოზე, - ასე აფასებს პარლამენტის თავმჯდომარის პირველი მოადგილე, გია ვოლსკი, ევროსაბჭოს საპარლამენტო ასამბლეის სადამკვირვებლო მისიის გვერდზე გამოქვეყნებულ დეკლარაციას, რომელსაც 24 დეპუტატი აწერს ხელს.

ვოლსკის თქმით, განცხადების ავტორი ესტონელი პარლამენტარი ერიკ კროსია, რომელიც სააკაშვილის მრჩეველი იყო.

“მორიგი სამარცხვინო შეტევა საქართველოზე. განცხადების ავტორი ესტონელი პარლამენტარი ერიკ კროსია, აგვისტოს ომის წინა პერიოდში სააკაშვილის მრჩეველი უსაფრთხოების საკითხებში”, - წერს გია ვოლსკი.

ევროპის საბჭოს საპარლამენტო ასამბლეის (PACE) ვებგვერდზე გამოქვეყნებულ დეკლარაციაში - “არჩევნები საქართველოში - საგანგაშო მოვლენები”, რომელსაც 24 დეპუტატი აწერს ხელს, ნათქვამია, რომ “საგანგაშო ცნობები მოდის საქართველოდან, რომლებიც აჩვენებს თუ როგორ ემზადება მმართველი პარტია მომავალი საპარლამენტო არჩევნების მოპარვისთვის. დეკლარაციის თანახმად, არჩევნების შედეგების საერთაშორისო აღიარების მისაღწევად საქართველოს ოფიციალურმა პირებმა უნდა შეწყვიტონ ანტიდემოკრატიული ქმედებები და შეცვალონ კურსი.