ივანიშვილი ხელისუფლებაში მოსვლის დღიდან მაქსიმალურად ცდილობს, რომ ახალგაზრდები არ იყვნენ პოლიტიკით დაინტერესებულები. ერთადერთი გამოსავალი, რაც ჩვენ გვაქვს, არის ხელისუფლების ცვლილება. ჩვენ თუ ამ არჩევნებში არ დავანახეთ, რისი თავი გვაქვს ახალ თაობას, შემდეგ არჩევნებში უკვე აღარავინ აღარ გაგვითვალისწინებს, რადგან ივანიშვილის ხელისუფლებაში დარჩენის შემთხვევაში ქვეყანაში დადგება ისეთი ვითარება, რაც გვაიძულებს ქვეყნის დატოვებას , - ამის შესახებ ,,ერთიანობა - ნაციონალური მოძრაობის“ პრესსპიკერმა, ლევან სანიკიძემ განაცხადა.

სანიკიძის თქმით, ბიძინა ივანიშვილი ხელისუფლებაში მოსვლის დღიდან, ავტორიტეტებს ებრძვის, რადგან ისინი სძულს.

„ივანიშვილის ერთ-ერთი მთავარი ნაბიჯი მას შემდეგ, რაც ის ხელისუფლებაში მოვიდა, იყო ავტორიტეტების ნგრევა. ამ ადამიანს არ უყვარს, როდესაც ამ ქვეყანაში არსებობს ავტორიტეტი და მეორე, რომ მაქსიმალურად ცდილობს, რომ ახალგაზრდები არ იყვნენ პოლიტიკით დაინტერესებულები, ან არსებობდეს განცდა, რომ პოლიტიკა არის ცუდი. თუ რომელიმე პოლიტიკოსი არ მოგწონს, არ ნიშნავს იმას, რომ საკუთარი თავი არ სცადო პოლიტიკაში. მესმის პარტიული ცხოვრება, რაღაც კლიშეები არსებობს, მათ შორის კომუნისტური წარსულიდან გამომდინარე, რომ რაღაც პარტიაში ყოფნა კონკრეტული პოლიტიკური ძალის ინტერესების გატარება შეიძლება ახალგაზრდულ ვნებათაღელვასთან და მდგომარეობის წინააღმდეგაც მოდიოდეს, მაგრამ მგონია, რომ ერთადერთი გამოსავალი, რაც ჩვენ გვაქვს არის ხელისუფლების ცვლილება. ჩვენ თუ ამ არჩევნებში არ დავანახეთ რისი თავი გვაქვს ახალ თაობას, შემდეგ არჩევნებში უკვე აღარავინ აღარ გაგვითვალისწინებს, რადგან ივანიშვილის ხელისუფლებაში დარჩენის შემთხვევაში, ჩვენ არ გვექნება ის თავისუფლება, რასაც მიჩვეული ვართ და დადგება ისეთი მდგომარეობა, რაც გვაიძულებს ქვეყნის დატოვებას“, - აღნიშნა ლევან სანიკიძემ.

„ერთიანობა - ნაციონალური მოძრაობის“ ღონისძიებაზე „ერთიანობა პასუხობს ხალხს“, სადაც შეხვედრა კითხვა-პასუხის რეჟიმში მიმდინარეობდა, საკითხი შეეხო ახალგაზრდებს, რომლებმაც ქართულ პოლიტიკაში უნდა დაიმკვიდრონ თავი.