სლოვაკეთის პრემიერ-მინისტრის, რობერტ ფიცოს განცხადებით, სლოვაკეთი არ დათანხმდება უკრაინის ნატო-ში გაწევრიანებას, სანამ ის პრემიერ-მინისტრის პოსტს იკავებს.

“სანამ სლოვაკეთის მთავრობის მეთაური ვიქნები, მივმართავ დეპუტატებს, რომლებიც ჩემი, როგორც მმართველი პარტიის თავმჯდომარის, კონტროლის ქვეშ არიან, არასოდეს დაეთანხმონ უკრაინის ნატო-ში გაწევრიანებას“, - აღნიშნა ფიცომ ადგილობრივ მედიასთან საუბარში.

მისი თქმით, ომი უკრაინაში მხოლოდ იმიტომ გრძელდება, რომ მას "დასავლეთი უჭერს მხარს, რათა რუსები დააჩოქონ".

სლოვაკეთის პრემიერმა ასევე აღნიშნა, რომ 2025 წელს, „მეორე მსოფლიო ომის“ დასრულების 80 წლისთავთან დაკავშირებით, მოსკოვში ჩასვლას გეგმავს. მისი მტკიცებით, რუსეთის მიერ „მეორე მსოფლიო ომის“ დროს გაღებულმა მსხვერპლა ხელი შეუწყო სლოვაკეთის ნაცისტური მმართველობისგან გათავისუფლებას.

”თავისუფლება მოვიდა აღმოსავლეთიდან და აბსოლუტურად ვერაფერი შეცვლის ამ ჭეშმარიტებას. გთხოვთ, ნუ ვიტანჯებით ამ რუსოფობიით. როცა დადებითად ვსაუბრობთ წითელ არმიაზე ან ყოფილ საბჭოთა კავშირზე, მაშინვე, ავტომატურად ნუ ვიტყვით, რომ პუტინის აგენტები ვართ“, - აღნიშნა რობერტ ფიცომ.

შეგახსენებთ, რამდენიმე დღის წინ სლოვაკეთის პრემიერმა განაცხადა, რომ ყველაფერს გააკეთებს ომის შემდეგ რუსეთთან ეკონომიკური და სტანდარტული ურთიერთობების განახლებისთვის.