„ნაციონალური მოძრაობის“ აჭარის უმაღლესი საბჭოს წევრი აცხადებს, რომ არჩევნების შემდეგ ბათუმის ცენტრალურ პარკთან 40-50-სართულიანი კორპუსის მშენებლობა იგეგმება
„ერთიანი ნაციონალური მოძრაობის“ აჭარის უმაღლესი საბჭოს წევრი ლევან ანთაძე აცხადებს, რომ არჩევნების შემდეგ ბათუმში, ცენტრალურ პარკთან 40-50-სართულიანი კორპუსის მშენებლობა იგეგმება. მისი ინფორმაციით, „პარკი ბიძინა ივანიშვილის ხელისუფლების სამიზნე გახდა“.
„ბათუმელებისთვის ერთ-ერთი ულამაზესი, 6 მაისის პარკი, სამწუხაროდ გახდა ივანიშვილის ხელისუფლების სამიზნე. ბოლო რამდენიმე წელია მიმდინარეობს განხილვა ზოოპარკის გაუქმებასთან დაკავშირებით, რის უკანაც დგას კორუფციული ინტერესები.
ჩვენი ინფორმაციით, შედგა გარიგება, რომლის მიხედვითაც არჩევნების შემდგომ იგეგმება 40-50 სართულიანი კორპუსების მშენებლობა პარკის ტერიტორიაზე, რაც იქნება კიდევ ერთი ბეტონის ფარდა.
ჩვენ ღიად ვაცხადებთ და გარანტიას ვაძლევთ ბათუმელებს, რომ ამ მზაკვრული მიზნის მიღწევას ვერ შეძლებენ.
ჩვენ მოსახლეობასთან და საკრებულოსთან ერთად შევძლებთ:
ზოოპარკი გადავიტანოთ ქალაქგარეთ;
პარკში, ზოოპარკის ტერიტორია იქნება მხოლოდ მწვანე, სარეკრეაციო ზონა და მკაცრად განისაზღვრება მისი სტატუსი;
აღდგება ამ პარკის ტრადიცია და სანიჩბოსნო სპორტი გახდება ამ პარკის კულტურის ნაწილი”,- აღნიშნა ლევან ანთაძემ.
