ისრაელის უსაფრთხოების უზრუნველსაყოფად, ძალის გამოყენებამ გზა უნდა დაუთმოს დიალოგისა და დიპლომატიის გამოყენებას, - The Times of Israel-ის ინფორმაციით, ამის შესახებ საფრანგეთის საგარეო საქმეთა მინისტრმა, ჟან-ნოელ ბარომ იერუსალიმში გამართულ პრესკონფერენციაზე განაცხადა.

„ამიტომ საფრანგეთი, ისევე როგორც მსოფლიოს უმეტესი ქვეყნები, მოუწოდებს ღაზას, ისევე როგორც ლიბანს, ცეცხლის შეწყვეტისკენ და როდესაც ჩვენ მოვუწოდებთ ცეცხლის შეწყვეტისკენ, არ შეგვიძლია იმავდროულად მივაწოდოთ თავდასხმითი იარაღი მეომარ მხარეებს. ეს არის თანმიმდევრულობის საკითხი“, - აღნიშნა საფრანგეთის საგარეო უწყების ხელმძღვანელმა.

შეგახსენებთ, რამდენიმე დღის წინ, საფრანგეთის პრეზიდენტი, ემანუელ მაკრონი ისრაელისთვის ღაზას სექტორში საბრძოლველად იარაღის მიწოდებების შეწყვეტის მოწოდებით გამოვიდა და განაცხადა, რომ ღაზას სექტორში თითქმის ერთწლიანი ომი “პოლიტიკურ მოგვარებას” საჭიროებს. ისრაელის პრემიერ-მინისტრმა, ბენიამინ ნეთანიაჰუმ ემანუელ მაკრონის ამ განცხადება სამარცხვინო უწოდა.