„ქართულ ოცნებას” ვერანაირი საარჩევნო პროგრამა და ტყუილი დაპირებები ვერ უშველის, - ამის შესახებ ”ერთიანობა - ნაციონალური მოძრაობის” ერთ-ერთმა ლიდერმა, ლევან ბეჟაშვილმა ჟურნალისტებთან “ქართული ოცნების” საარჩევნო პროგრამაზე საუბრისას განაცხადა.

მისი თქმით, 26 ოქტომბერს ქართველმა ხალხმა უნდა გაიმარჯვოს და ამ ქვეყანას დაუბრუნოს ევროპული არჩევანი

“ქართული ოცნების” საარჩევნო პროგრამები ამ 12 წლის განმავლობაში საქართველოს მოსახლეობას უამრავჯერ აქვს მოსმენილი და ყველა ჯერზე იმედგაცრუება, ტყუილი დაპირებები, ხალხისთვის გაუარესებული მდგომარეობა და ივანიშვილის კლანის უსაზღვროდ გამრუდებაა შედეგი. ვერანაირი საარჩევნო პროგრამა და ტყუილი დაპირებები ვერ უშველის. 26 ოქტომბერს ქართველმა ხალხმა უნდა გაიმარჯვოს და ამ ქვეყანას დაუბრუნოს ევროპული არჩევანი“, - აღნიშნა ლევან ბეჟაშვილმა.

კითხვაზე, მისი აზრით, რატომ არ ესწრებოდა საარჩევნო პროგრამის წარდგენას „ქართული ოცნების საპატიო თავმჯდომარე, ბიძინა ივანიშვილი და პარტიის თავმჯდომარე, ირაკლი ღარიბაშვილი, ბეჟაშვილმა უპასუხა, რომ ბიძინა ივანიშვილმა თავად ძალიან კარგად იცის საზოგადოების დამოკიდებულება და ტენდენციები და გაპასიურება ამას უკავშირდება.

„ბიძინა ივანიშვილმა თავად ძალიან კარგად იცის საზოგადოებრივი დამოკიდებულება და ტენდენციები. დღეს „ქართული ოცნება“ არჩევნებს აგებს. დღეს „ქართული ოცნება“, მათ შორის, ბიძინა ივანიშვილი და მისი კლანის წევრები საერთაშორისო სანქციების ქვეშ არიან. ამიტომ, მათთვის ბუნებრივია, ეს მოცემულობა ცნობილია და ამიტომ, საარჩევნო პროგრამაში მათი გაპასიურებაც ამას უკავშირდება“, - განაცხადა ბეჟაშვილმა