„ერთიანობა - ნაციონალური მოძრაობის” აჭარის ორგანიზაციის ინფორმაციით, 16:00 საათიდან საჯარო დაწესებულებები დაიკეტება, რადგან “ქართული ოცნების” წინასაარჩევნო ღონისძიებაზე მოსახლეობა ძალის გამოყენებით მიჰყავთ.

„ერთიანი ნაციონალური მოძრაობის” წევრის ნიკა ქაშიბაძის ინფორმაციით, ერთ-ერთ სასწავლო დაწესებულებაში ბათუმის მერი არჩილ ჩიქოვანი იმყოფებოდა, რომელიც მასწავლებლებსა და იქ დასაქმებულებს აქციაზე მისვლისკენ მოუწოდებდა.

„16:00 საათის შემდეგ მოსახლეობისთვის საჯარო დაწესებულებები დაიკეტება, იმიტომ რომ ხალხი კოლბიან დიქტატორთან შესახვედრად გაიყვანონ. ვიცით, რომ მოსახლეობის დიდი ნაწილი, საჯარო რესურსის გამოყენებით მიჰყავთ ამ ღონისძიებაზე, რაშიც ხელისუფლების სრული ვერტიკალია ჩართული. ასევე, არჩილ ჩიქოვანი ერთ-ერთ სასწავლო დაწესებულებაში პროცესის დროს იმყოფებოდა და ჩვენი ინფორმაციით, სწორედ ამაზე ჰქონდა საუბარი, რომ მასწავლებლები და კონკრეტულ დაწესებულებაში დასაქმებულები აქციაზე გამოსულიყვნენ, რაც ადასტურებს რომ ხალხი „ქართული ოცნების“ ღონისძიებაზე ზეწოლით გაჰყავთ.

ჩვენ გვინდა, ამ მოქალაქეებს ვუთხრათ, ვიცით რა მძიმე და რთულ პირობებში უწევთ ცხოვრება, მიუხედავად იმისა, ვიცით რა ზეწოლას განიცდიან ყოველდღიურ რეჟიმში, ყველაფერი ერთად ქართველმა ხალხმა უნდა დავასრულოთ 26 ოქტომბერს, ამ არჩევნებში ჩვენ უნდა გავიმარჯვოთ, სწორედ იმიტომ რომ მსგავსი სიბინძურეები ამ ქვეყანაში აღარ განმეორდეს“, - აცხადებს ნიკა ქაშიბაძე.