უკრაინის პრეზიდენტის ადმინისტრაციის ხელმძღვანელი, ანდრეი ერმაკი საქართველოს პრემიერ-მინისტრის, ირაკლი კობახიძის განცხადებას ეხმაურება, რომლის თქმითაც, „ქართული ოცნების“ ბილბორდებმა და სარეკლამო ვიდეორგოლმა გააშიშვლა სიმართლე უკრაინა-რუსეთის ომის შესახებ.

„ვნახე ეს განცხადება. დარწმუნებული ვარ, ქართველი ხალხი მშვენივრად ხვდება სიმართლეს და სწორედ ამიტომ უჭერს მხარს უკრაინელებს რუსეთის აგრესიის წინააღმდეგ ბრძოლაში“, - წერს ერმაკი „ტელეგრამ“ არხზე.

შეგახსენებთ, საქართველოს პრემიერ-მინისტრმა, ირაკლი კობახიძემ გუშინ განაცხადა, რომ „ქართული ოცნების“ წინასაარჩევნო ბილბორდებმა და სარეკლამო ვიდეორგოლმა „გააშიშვლა სიმართლე უკრაინა-რუსეთის ომის შესახებ“.

მისი შეფასებით, კონკრეტული სუბიექტები წუხან „ქართული ოცნების“ ბილბორდების და შესაბამისი ვიდეორგოლის გამო ერთი მარტივი მიზეზით - ისინი 2.5 წლის განმავლობაში „წარმატებით ახერხებდნენ, საქართველოს მოსახლეობისთვის დაემალათ რა ხდებოდა და რა ხდება დღეს უკრაინაში“.