მარნეულის მუნიციპალიტეტს ოფიციალური ვიზიტით ჩინეთის სახალხო რესპუბლიკის, კერძოდ, სიანის ტექნიკური უნივერსიტეტის წარმომადგენლობითი დელეგაცია ეწვია. ამის შესახებ ინფორმაციას მარნეულის მერიის პრესსამსახური ავრცელებს.

როგორც გავრცელებულ ინფორმაციაშია ნათქვამი, ჩინეთის დელეგაციას მარნეულის მუნიციპალიტეტის მერმა კენან ომაროვმა საქართველოს პარლამენტის წევრ ზაურ დარგალთან, მარნეულის მუნიციპალიტეტის საკრებულოს თავმჯდომარე ამირან გიორგაძესთან და მოადგილეებთან თემურ შუბითიძესთან და ზურაბ ფანგანთან ერთად უმასპინძლა.

პრესსამსახურის ინფორმაციით, ოფიციალურ შეხვედრაზე ხაზგასმით აღინიშნა მარნეულის მუნიციპალიტეტისა და სიანის ტექნიკური უნივერსიტეტის თანამშრომლობის გაძლიერების მნიშვნელობა და შესაძლებლობების განვითარება სხვადასხვა სექტორული მიმართულებით.

„მარნეულის მუნიციპალიტეტი ყოველთვის ღიაა ახალი ინიციატივებისა და პროექტებისთვის, რომლებიც ხელს შეუწყობს ჩვენი რეგიონის განვითარებას. ასეთი ვიზიტები კი საშუალებას გვაძლევს, გავაღრმაოთ კავშირები საერთაშორისო პარტნიორებთან და განვახორციელოთ ერთობლივი ინიციატივები, რომლებიც ორივე მხარისთვის სასარგებლო იქნება", - განაცხადა მარნეულის მუნიციპალიტეტის მერმა კენან ომაროვმა.

შეხვედრა სიმბოლური საჩუქრების გადაცემით დასრულდა.