სად ურევს რამეს „ნაციონალური მოძრაობა”? თუ ვინმე ამ ქვეყანაში რამეს ურევს, ეს არის „ქართული ოცნება” - მათ გარდა არავის უნდა ომი, ურთიერთდაპირისპირება და შუღლის გაღვივება, - ამის შესახებ „ერთიანობა - ნაციონალური მოძრაობის” წევრმა, ლევან სანიკიძემ განაცხადა, რითაც „ქართული ოცნების” საპატიო თავმჯდომარის, ბიძინა ივანიშვილის განცხადებებს გამოეხმაურა.

სანიკიძის თქმით, ქვეყნის მშვიდობის გარანტი, მხოლოდ ევროკავშირისა და დასავლეთის ქვეყნების ნაწილად ყოფნა იქნება.

„სად ურევს რამეს „ნაციონალური მოძრაობა”? მგონი, ამ ქვეყანაში თუ ვინმე რამეს ურევს, ეს არის „ქართული ოცნება”, სანქცირებული „ხარებას” ზონდერ-ჯგუფებით რომ აპირებენ ქვეყანაში დემოკრატიული არჩევნების ჩატარებას. ამ ქვეყნის სამშვიდობოს გაყვანა მოხდება, თუკი ევროკავშირისა და დასავლეთის ქვეყნების ნაწილი გახდება. მხოლოდ ეს შეიძლება იყოს მშვიდობის გარანტი. შეუძლებელია, ოკუპანტი, ანუ რუსეთი, იყოს მშვიდობის გარანტი. ამ ვითარებაში, მათი მხრიდან ნებისმიერი გზავნილი მშვიდობასთან დაკავშირებით, მათ შორის, სუვერენიტეტის დაცვასთან დაკავშირებით, არის მათ მიერ გადადგმული ნაბიჯების საპირისპირო იმიტომ, რომ ამ ქვეყანაში არავის არ უნდა ომი, არავის არ უნდა ურთიერთდაპირისპირება და შუღლის გაღვივება გარდა ერთი პოლიტიკური პარტიისა, რომელსაც „ქართული ოცნება” ჰქვია”, - განაცხადა ლევან სანიკიძემ, რომლის კომენტარსაც პარტიის პრესსამსახური ავრცელებს.