დღეს, როდესაც არჩევნებამდე სულ რამდენიმე დღე არის დარჩენილი, გენერალური ამოცანა, რომელზეც ჩვენ ვართ ფოკუსირებული, არის საერთო ოპოზიციური ეროვნული გამარჯვების მოტანა ერთიანობით, - ასე უპასუხა „ერთიანობა - ნაციონალური მოძრაობის“ თავმჯდომარემ თინა ბოკუჩავამ ჟურნალისტების კითხვას, უნდა დასახელდეს თუ არა ტექნიკური მთავრობა არჩევნებამდე.

როგორც ბოკუჩავა აღნიშნავს, „ერთიანობა ნაციონალური მოძრაობა“ არის ქართული ქარტიის ხელმომწერი, რომელიც საქართველოს ევროინტეგრაციის პროცესის მნიშვნელოვან გზამკვლევად მიაჩნია.

„ერთიანობა - ნაციონალური მოძრაობა“ არის ევროინტეგრაციის პროცესის ერთგული, შესაბამისად, ქართული ქარტიის და ყველა იქ გაწერილი რეფორმის, რომელიც შემდეგ კოალიციურმა ხელისუფლებამ აუცილებლად უმოკლეს ვადებში უნდა გაატაროს. დღეს, როდესაც არჩევნებამდე სულ რამდენიმე დღე არის დარჩენილი, გენერალური ამოცანა, რომელზეც ჩვენ ვართ ფოკუსირებული, არის საერთო ოპოზიციური ეროვნული გამარჯვების მოტანა ერთიანობით. იმის უზრუნველყოფა, რომ საქართველოს თითოეული მოქალაქე მივიდეს საარჩევნო უბანზე და გააკეთოს არჩევანი საკუთარი ევროპული კეთილდღეობისთვის. მჯერა, რომ დღეს მთავარი, ეროვნული ამოცანა არის სწორედ ერთიანობით საარჩევნო გამარჯვების მოტანა“,-განაცხადა ბოკუჩავამ.

მისი შეფასებით, პრეზიდენტმა სალომე ზურაბიშვილმა მნიშვნელოვანი როლი ითამაშა ქართულ ქარტიის შედგენაში.

„დარწმუნებული ვარ, მომავალშიც მნიშვნელოვან როლს ითამაშებს, როგორც კონსტიტუციის გარანტი, მათ შორის საარჩევნო შედეგის გარანტი თავისუფალი საქართველოს მოქალაქეების მიერ გაკეთებული არჩევანის შედეგად. ისევე, როგორც კოალიციური მთავრობის ფორმირების პროცესში, რომელიც მჯერა, მრავალპარტიული მთავრობა იქნება, რომელიც ჩვენს ქვეყანას ევროკავშირში შეიყვანს“,-განაცხადა ბოკუჩავამ.