ევროკავშირის საგარეო საქმეთა მინისტრები ახალს ვერაფერს იტყვიან, გარდა იმისა, რაც უცხოურ აგენტურას დღის წესრიგით აქვს გათვალისწინებული - საგარეო საქმეთა მინისტრების ფორმატი, არჩევნებამდე გაკეთებული წინასწარი განცხადებები ადასტურებს იმას, რასაც ჩვენ ვამბობთ: - უცხოურ ძალებს არ სურთ, საქართველოში ეროვნული ხელისუფლება იყოს! - ასე უპასუხა საპარლამენტო უმრავლესობის წევრმა გურამ მაჭარაშვილმა ლუქსემბურგში, ევროკავშირის საგარეო საქმეთა მინისტრების საბჭოსთან დაკავშირებით დასმულ კითხვას.

მაჭარაშვილის თქმით, „ასეთია სამწუხარო მოცემულობა, თუმცა საბედნიეროდ, ევროპაშიც და სხვა ქვეყნებშიც არსებობენ ადამიანები, რომლებიც საქართველოს გულშემატკივრები არიან“.

„ევროპარლამენტში ბევრი დეპუტატი გამოვიდა და საქართველოს სუვერენიტეტს და დამოუკიდებლობას დაუჭირა მხარი.

ევროკავშირის საგარეო საქმეთა მინისტრების ფორმატი, არჩევნებამდე მათი წინასწარი განცხადებები ადასტურებს იმას, რასაც ჩვენ ვამბობთ: უცხოურ ძალებს არ სურთ, საქართველოში ეროვნული ხელისუფლება იყოს. უნდათ, ის ხელისუფლება იყოს, ვინც თავიდან ბოლომდე დამოკიდებული იქნება უცხოურ ძალაზე, როგორც ამას ოპოზიციასა და სალომე ზურაბიშვილის შემთხვევაში ვხედავთ.

უცხოურ ძალას უკვე ხელი აქვს ჩაქნეული, რომ ოპოზიცია გამარჯვებას ოდნავ მაინც მიუახლოვდება. ეს ხელის ჩაქნევა იმაშიც გამოიხატება, რომ წინასწარი დასკვნა 20 ოქტომბრის ნაცვლად, 30 ოქტომბერს გადაიტანეს. უკვე განცხადებები კეთდება არა 26 ოქტომბრამდე სიტუაციაზე, არამედ მას შემდეგ. აშშ-ს საელჩოს შეტყობინებები იყო, რომ ქუჩაში გამოსვლისგან თავი 26-ის შემდეგ შეიკავონ და არა - მანამდე. იციან, რომ პირწმინდად წააგებენ და ახლა გეგმა "ბ" აქვთ, რომ ქვეყანაში რადიკალური პროცესები იყოს.

იციან, რომ ესეც მათი გამარჯვებით არ დასრულდება და ქართული სახელმწიფო გაიმარჯვებს, მაგრამ მცდელობა ექნებათ, რადგან სხვა გზა არა აქვთ", - განაცხადა გურამ მაჭარაშვილმა.

დღეს, ლუქსემბურგში, ევროკავშირის საგარეო საქმეთა საბჭო გაიმართება, რომელსაც ევროკავშირის უმაღლესი წარმომადგენელი საგარეო საქმეთა და უსაფრთხოების პოლიტიკის საკითხებში, ჯოზეფ ბორელი უხელმძღვანელებს.

ევროკავშირის ვებგვერდზე გამოქვეყნებული პრესრელიზის თანახმად, ევროკავშირის საგარეო საქმეთა მინისტრები, სხვა საკითხებთან ერთად, საქართველოზეც იმსჯელებენ.